Teksa na ndajnë pak ditë nga fillimi i vitit të ri shkollor 2025-2026, infrastruktura e disa shkollave në Tiranë lë shumë për të dëshiruar.
Videot e dërguara në redaksinë e BoldNews, tregojnë gjendjen alarmante të shkollës 9-vjeçare “Ahmet Gashi” në Laprakë: mure të zhgarravitura, pllaka të thyera, karrige e tavolina të shkatërruara, pra klasa që duket se nuk janë mirëmbajtur prej vitesh. Nxënësit dhe mësuesit do të përballen këtë vit me kushte që jo vetëm nuk inkurajojnë mësimin, por duken më shumë si sfidë për t’u përballuar çdo ditë.
Ndërkohë, ministrja e Arsimit, Ogerta Manastirliu, nuk e ndal propagandën në rrjetet sociale, duke na treguar vetëm anën e mire të mollës.
Pëmes disa postimeve në rrjete sociale, ministrja thotë se gjimnazet dhe shkollat do të hapin dyert këte vit shkollor me kushte dinjitoze dhe klasa të reja, por siç mund të shihet dhe në pamjet e mëposhtme “kushtet dinjitoze” të Manastirliut janë shume larg me realitetin.
Ndërsa ministrja ndan në Instagram imazhe të shkollave të përmirësuara, shumë nxënës në Tiranë do të ulen në karrige të thyera, do të gjejnë tavolina të shkatërruara dhe mure të mbuluara me grafite.
