Arbër Veliaj, vëllai i kryebashkiakut të Tiranës në detyrë, Erion Veliaj, ka mbërritur sot në ambientet e SPAK për t’u marrë në pyetje si person që ka dijeni lidhur me hetimet për vëllain e tij, Erion Veliaj, i arrestuar më 10 shkurt 2025 nën akuzat për korrupsion, pastrim parash dhe fshehje të pasurisë.
Sipas materialeve hetimore, emri i Arbër Veliaj përmendet në disa episode të dosjes së përgatitur nga SPAK për vëllain dhe bashkëshorten e tij, Ajola Xoxe, për lëvizje financiare që ngrejnë dyshime për përfshirje në raste të pastrimit të parave.
Ndër të tjera, Arbër Veliaj kishte nënshkruar një kontratë prej 300 mijë eurosh për të siguruar shërbime këshillimi ligjor për Erion Veliaj nga një studio amerikane, ndërkohë që Prokuroria e Posaçme nuk ka ngritur ende ndonjë akuzë ndaj tij.
Materialet e SPAK tregojnë se Arbër Veliaj ka marrë pjesë në menaxhimin e fushatës mediatike dhe në koordinimin e përfaqësuesve ligjorë ndërkombëtarë për vëllain e tij gjatë kohës që ky ndodhej në paraburgim.
Po ashtu, hetimet kanë evidentuar raporte financiare mes kompanisë së Arbër Veliajt, “Gogel Shpk”, dhe organizatave të kontrolluara nga Ajola Xoxe, duke përfshirë shuma me vlera të konsiderueshme që SPAK i konsideron të dyshimta ose fiktive.
Në dosje përmenden gjithashtu lidhje të kompanisë “Gogel” me shoqërinë “One Albania”, e cila ka përfituar fonde publike nga Bashkia e Tiranës, duke ngritur dyshime për trafik interesash dhe qarkullim të parave brenda familjes Veliaj.
Përveç kësaj, Arbër Veliaj rezulton të ketë blerë prona dhe objekte të ndryshme nga shoqëri ndërtimi që lidhen me persona të përfshirë në hetimet e SPAK, përfshirë kompaninë “AgiKons” të Gent Sulës.
LEXO EDHE:
Arbër Veliaj, njeriu i “punëve të pista” të Erionit, që çuditërisht u fal nga SPAK
