Partia Demokratike ka reaguar në lidhje me skandalin që ka përfshirë arkitektin italian Stefano Boeri në Milanos në Itali, i cili në fund të vitit 2024 iu caktua “arrest në shtëpi” pas akuzve për korrupsion dhe shpërdorim detyre në lidhje me konkursin e Bibliotekës Evropiane të Informacionit dhe Kulturës (BEIC).
Në Shqipëri Boeri njihet si mik i Edi Ramës dhe si një ndër emrat më të lakuar nga qeveria dhe Bashkia Tiranë për “projekte moderne”, ose i njohur ndryshe si arkitekti i kullave të Tiranës.
Pavarësisht akuzave të para, Boeri u shfaq në Tiranë në festivalin e arkitektëve “Bukë dhe Zemër”. Ai mbajti një fjalim të gjatë ku shpjegonte pse e konsideronte Tiranën si një “mrekulli urbane”.
Zëdhënësja e PD-së, Genta Vangjeli deklaroi nga selia blu se në Shqipëri, vizioni urban i Stefano Boerit nuk lidhet aspak me nevojat e komunitetit, por me një model zhvillimi të diktuar nga interesat klienteliste të Ramës.
“Ndërkohë që Tirana vuan nga mungesa e hapësirave publike, gjelbërimit, transporti publik si dhe shërbime të tjera bazë për qytetarët, Boeri hartoi projekte të cilat shërbejnë vetëm për zbukurimin e fasadës së një pushteti të korruptuar që nuk ka asnjë lidhje me banorët e thjeshtë.” – tha ajo.
Vangjeli shtoi më tej se diferenca qëndron tek drejtësia, ku në Itali funksionon dhe Stefano Boeri po përballet me ligjin, në Shqipëri, miqtë e Edi Ramës përjashtohen nga hetimet.
Deklarata e zëdhënëses së Antikorrupsionit në PD, Genta Vangjeli:
Arkitekti italian Stefano Boeri, miku personal i Kryeministrit Edi Rama, me biznes të zyrtarizuar në zemër të Bllokut në Tiranë, aktualisht është nën hetim në Itali për afera korruptive të lidhura me ‘zgjerim të pakontrolluar ndërtimi’.
Në Shqipëri, vizioni urban i tij nuk lidhet aspak me nevojat e komunitetit, por me një model zhvillimi të diktuar nga interesat klienteliste të Ramës, duke anashkaluar konsultimin publik dhe pa asnjë ndjeshmëri ndaj identitetit historik të qytetit.
Ndërkohë që Tirana vuan nga mungesa e hapësirave publike, gjelbërimit, transporti publik si dhe shërbime të tjera bazë për qytetarët, Boeri hartoi projekte të cilat shërbejnë vetëm për zbukurimin e fasadës së një pushteti të korruptuar që nuk ka asnjë lidhje me banorët e thjeshtë.
E konkretisht projektet që mbajnë emrin e tij janë:
- ‘Vertical Forest Tirana’
- ‘Tirana Riverside’
- ‘Tirana 2030’
- ‘Kubi i Bllokut’
- ‘Blloku West’
- ‘Pylli Orbital 030’ , etj …
Të gjitha këto projekte ndajnë të njëjtën filozofi: përfitimi i pushtetit dhe oligarkëve, ndërsa qytetari i thjeshtë mbetet i përjashtuar nga vendimmarrja dhe përfitimi.
Diferenca qëndron në faktin se ndërsa në Itali drejtësia funksionon dhe nga hetimet nuk përjashtohet askush i dyshuar si shkelës i ligjit, në Shqipëri miqtë e KM përjashtohen nga hetimet pavarësisht denoncimeve të vazhdueshme nga opozita dhe Partia Demokratike për ndërtime pa kriter, pastrim parash dhe abuzime me planifikimin urban.
Sot, ndërkohë që Stefano Boeri përballet me drejtësinë italiane, qyteti i Tiranës përballet me pasojat e një modeli urban të ndërtuar mbi korrupsion, mungesë transparence dhe marrëveshje klienteliste.
Partia Demokratike insiston në kërkesën e saj për hetim të menjëhershëm të të gjitha këtyre projekteve në Shqipëri dhe sjelljen e të gjithë përgjegjësve përpara drejtësisë.
E ardhmja e Shqipërisë nuk mund të ndërtohet mbi betonin e pabarazisë, propagandës dhe shpërdorimit të pushtetit.
