Presidenti i SHBA-së, Donald Trump, ka kërcënuar Bashkimin Evropian me vendosjen e tarifave të larta nëse nuk realizohen investimet e premtuara nga ana e BE-së në SHBA.
Në një intervistë për CNBC, Trump deklaroi se BE-ja i ka premtuar 600 miliardë dollarë investime dhe nëse kjo shumë nuk konkretizohet, ai do të vendosë tarifa deri në 35 për qind ndaj produkteve evropiane.
“Ata më dhanë 600 miliardë dollarë, është një dhuratë. Mund t’i përdor për çfarë të dua”, u shpreh Trump, duke theksuar se kjo është një mënyrë për të “korrigjuar padrejtësitë” tregtare ndaj SHBA-së.
Megjithatë, kjo deklaratë bie në kundërshtim me informacionin zyrtar nga Komisioni Evropian. Sipas këtij të fundit, bëhet fjalë për shprehje interesi nga kompani private evropiane për të investuar në SHBA, e jo për një marrëveshje të detyrueshme apo për një angazhim financiar të vetë BE-së si institucion. Komisioni po ashtu sqaroi se nuk ka një listë të publikuar të kompanive që kanë shprehur interes, duke shtuar se si autoritet publik nuk mund të garantojë investimet.
Një tjetër pjesë e marrëveshjes paraprake për të cilën foli Trump është blerja nga BE-ja e energjisë amerikane me vlerë 750 miliardë dollarë, një shumë që i tejkalon ndjeshëm importet aktuale të energjisë së BE-së nga e gjithë bota, të cilat në vitin 2024 arritën në 375.9 miliardë euro, sipas të dhënave nga Eurostat.
Ekspertët janë skeptikë për mundësinë që SHBA-të të përmbushin një volum të tillë eksporti energjie, ndërsa disa komentues në mediat amerikane e kanë interpretuar këtë deklaratë si një përpjekje të Trump për vetëpromovim.
Ndërkohë, të enjten do të hyjnë në fuqi tarifa shtesë prej 15 për qind për shumicën e produkteve të BE-së, përfshirë edhe makinat.
