Greu i grupit parlamentar të PD-së, Gazment Bardhi, ka publikuar një tjetër video nga një qendër votimi në qarkun Fier, ku sipas tij vëzhgues të Partisë Socialiste ushtrojnë kontroll mbi votat e qytetarëve duke cenuar fshehtësinë e votës.
Në video shfaqet se si vëzhguesit dhe komisionerët nxjerrin votat nga kutia për t’i verifikuar. Bardhi e cilëson këtë një krim zgjedhor dhe akuzon mungesën e reagimit nga institucionet përgjegjëse, si KQZ, Prokuroria dhe SPAK.
Ai thekson se zgjedhjet e 11 majit nuk kanë qenë të lira, të drejta dhe të barabarta dhe kërkon garantimin e standardeve demokratike për integrimin europian të Shqipërisë.
Videoja është regjistruar në qendrën e votimit nr. 2817, në Njësinë Administrative Dushk, Bashkia Lushnje.
Më poshtë postimi i Gazment Bardhit dhe video që tregon procesin e votimit:
Kontrolli i çdo vote të qytetarëve nga komisionerët dhe vëzhguesit e PS ishte mekanizmi kriminal që Belinda Balluku përdori në qarkun Fier për të mbajtur nën presion çdo votues. Nëse ndonjë votues votonte vetëm, i pa shoqëruar, nxirreshin votat nga kutia për të verifikuar mënyrën sesi kanë votuar qytetarët, siç tregojnë edhe këto pamje zyrtare të kamerave të QV-së.
Ky është një krim zgjedhor i rëndë por që mbetet i pandëshkuar, sepse KQZ, Prokuroria e Përgjithshme dhe SPAK, kishin për qëllim përmes Task-Forcës të bënin shoë dhe jo punën e tyre.
Shqipëria nuk mund të bëjë përpara në procesin e integrimit europian nëse nuk garanton zgjedhje të lira, të drejta dhe të barabarta. Zgjedhjet e 11 Majit nuk përmbushnin asnjë nga këto standarde.
QV 2817, Njësia Administrative Dushk, Bashkia Lushnje
