Një vatër zjarri ka shpërthyer këtë të diel në malin e Skërficës, në territorin e Bashkisë Delvinë, duke djegur sipërfaqe të konsiderueshme kullote malore.
Zjarri rrezikon të përhapet drejt territorit të Bashkisë së Gjirokastrës, teksa në mesditë drejt vendit të ngjarjes janë nisur një grup zjarrfikësish për të ndërhyrë në terren.
Nga informacionet e fundit mësohet se zjarri vijon të jetë aktiv dhe në varësi të drejtimit të erës, mund të marrë përmasa më të mëdha, duke kërcënuar drejtpërdrejt pyllin e mbrojtur të Pikësit.
Për shkak të largësisë dhe terrenit të thepisur malor, forcat zjarrfikëse të Gjirokastrës nuk kanë mundur të ndërhyjnë dot me mjete tokësore.
Duke marrë parasysh vështirësinë e terrenit dhe rrezikun e lartë për përhapjen e zjarrit në sipërfaqet pyjore të mbrojtura, autoritetet e konsiderojnë të domosdoshme një ndërhyrje emergjente nga ajri, për të shmangur dëmtime të parikuperueshme në zonën e mbrojtur.
