Një ngjarje e rëndë tronditi qytetin e Fierit, ku 56-vjeçari Anesti Rama u vra nga vajza e tij, 26-vjeçarja Emanilda Rama. Ajo dyshohet se ka vrarë babanë e saj duke e mbytur me tel, dhe më pas ka inskenuar ngjarjen duke e kallëzuar në polici si një aksident.
Ngjarja ndodhi në banesën e familjes në fshatin Frashër, në mbrëmjen e 23 korrikut 2025. Rreth orës 23:00, Emanilda Rama njoftoi policinë duke pretenduar se babai i saj kishte humbur jetën aksidentalisht.
Pas kallëzimit, autoritetet nisën hetimet, ku gjatë marrjes në pyetje dhe veprimeve të para u krijuan dyshime se vdekja nuk ishte aksidentale. Hetimet zbuluan se 26-vjeçarja kishte vrarë babanë me mjet strangulues, duke e mbytur me tel, për motive të dobëta.
Pas këtij akti, ajo dyshohet se në bashkëpunim me nënën e saj, 53-vjeçaren V. R., e cila është edhe bashkëshortja e viktimës, kanë tentuar të fshehin të vërtetën. Sipas hetimeve, ato kanë pastruar trupin dhe kanë bërë përpjekje për të inskenuar ngjarjen si aksidentale, në mënyrë që të shmangin përgjegjësinë penale.
Sipas raportimeve nënë e bijë dyshohet se kishin planifikuar vrasjen. Disa ditë më parë, ato e kishin çuar 56-vjeçarin për një kontroll te kardiologu, si përpjekje për të krijuar një shpjegim mjekësor për vdekjen e tij të befasishme.
- Dëshmia e vajzës në polici
Pas mbytjes, Emanilda ka deklaruar në polici se babai kishte rrëshqitur në banjë dhe kishte vdekur. Bashkë me të ëmën, kishin larë dhe veshur trupin përpara se të njoftonin autoritetet rreth orës 01:00 të mëngjesit.
26- vjeçarja në dëshminë e saj në polici ka pranuar krimin pasi sipas saj i ati e trajtonte me shumë fanatizëm, duke mos e lejuar as të vishet në mënyrë bashkëkohore e as te argëtohet, një sjellje që i ushtronte shumë presion në përditshmërinë e saj.
E reja ka qenë e fejuar dhe është ndarë nga partneri pasi ishte në gjendje të dobët ekonomike dhe jetonte me prindërit dhe punonte në bujqësi.
- Njoftimi i policisë:
Drejtoria Vendore e Policisë Fier/Si rezultat i hetimeve të shpejta dhe profesionale, zbardhet dinamika dhe autorësia e një krimi në familje.
Vrau babanë e saj, nëpërmjet strangulimit (mbytje me tel), dhe e kallëzoi në polici, rreth mesnatës, si ngjarje aksidentale, arrestohet 26-vjeçarja.
Shoqërohet nëna e saj, pasi dyshohet se ka bashkëpunuar për pastrimin e trupit të 56-vjeçarit të vrarë, me qëllim inskenimin e ngjarjes si aksidentale.
Si rezultat i hetimeve profesionale dhe të shpejta, të kryera nga specialistët e Seksionit për Hetimin e Krimeve të Rënda të Drejtorisë Vendore të Policisë Fier, në bashkëpunim me Prokurorinë e Fierit, pas kallëzimit të shtetases E. R., 26 vjeçe, rreth orës 23:00 të datës 23.07.2025, se babai i saj, shtetasi A. R., 56 vjeç, kishte humbur jetën aksidentalisht, në banesën e tyre, në fshatin Frashër, u finalizua operacioni “Inskenimi”.
Shërbimet e Policisë, gjatë deponimit të 26-vjeçares dhe gjatë veprimeve të para hetimore, kanë krijuar dyshim se humbja e jetës së 56-vjeçarit nuk ishte aksidentale dhe për këtë arsye kanë vijuar hetimet e thelluara.
Gjatë këtyre veprimeve të kryera në koordinim me Prokurorinë e Fierit, ka rezultuar se shtetasja E. R. ka vrarë babanë e saj, shtetasin A. R., për motive të dobëta, me mjet strangulues (mbytur me tel).
Më pas, 26-vjeçarja, dyshohet se në bashkëpunim me nënën e saj, njëkohësisht bashkëshorte e shtetasit A. R., shtetasen V. R., 53 vjeçe, kanë tentuar të pengojnë zbulimin e së vërtetës, duke pastruar trupin e 56-vjeçarit. Pas këtyre veprimeve, shtetasja E. R. ka njoftuar Policinë.
53-vjeçarja është aktualisht e shoqëruar në ambientet e Drejtorisë Vendore të Policisë Fier, ku po kryhen veprime të thelluara hetimore për të përcatuar shkallën e përgjegjësisë së saj në lidhje me këtë rast. Në përfundim të veprimeve hetimore do të ketë njoftim shtesë për përgjegjësinë penale të kësaj shtetaseje.
Gjithashtu, vijojnë hetimet, në drejtimin e Prokurorisë, me qëllim dokumentimin me prova ligjore të të gjitha rrethanave të këtij rasti.
Vrau të atin! 26-vjeçarja ishte kthyer në shtëpinë e prindërve pas ndarjes nga partneri (DETAJE)
