Siguria ushqimore në vendin tonë është në ditën më të zezë, ndërsa shqiptarët çdo ditë konsumojnë ushqime jashtë standardit.
Autoritetet janë indiferente, kurse inspektorët e AKU-së në terren sillet si “taksidarë” ku pasi mbushin “xhepin” me para korrupsioni, mbyllin sytë përballë sjelljeve kriminale të subjekteve që tregtojnë ushqime.
Së fundmi deputeti socialist Erion Braçe ngriti alarmin për sigurinë ushqimore dhe mungesën e kontrollit nga institucionet përgjegjëse ndaj industrisë së përpunimit të qumështit në Shqipëri.
Braçe vuri në pikëpyetje transparencën e proceseve në fabrikat e mëdha të përpunimit të qumështit si dhe mungesën e gjurmueshmërisë nga autoritetet tatimore dhe AKU për produktet e importuara si qumështi pluhur dhe vaji i palmës.
Braçe paralajmëroi se nëse nuk merren masa, do të publikojë një listë me etiketat e miratuara nga AKU që tregojnë përdorimin e qumështit pluhur dhe vajit të palmës në produkte të përpunuara.
“Ku shkon vaji i palmës dhe qumështi pluhur që hyn në doganë? A i ka gjurmuar ndonjëherë tatimet, përveç kur isha unë zv/kryeministër dhe i detyrova tatimet dhe akut ë gjurmonin se ku përfundonte qumështi pluhur dhe vaji i palmës që hynte në territorin e Shqipërisë. Me përjashtim të atij rasti, a kanë hetuar ndonjëherë se si është përdorur qumështi pluhur dhe vaji i palmës? Unë kam një listë të etiketave të miratuar nga AKU të përdorimit të qumështit pluhur dhe vajit të palmës, unë e kam këtë listë dhe po vazhdoi kjo histori unë do të publikoj listën. Sepse nuk janë baxhot, ata që mbledhin qumësht nga fermerët e fshatrave, që cenojnë sigurinë ushqimore. E dini kush janë? Janë fabrikat e mëdha!”, tha Braçe në Dritare TV.
Deklaratat e Braçes vijnë në një moment kur shqetësimet për cilësinë e ushqimeve dhe mungesën e kontrollit të produkteve të importuara janë në rritje. Kjo ndërhyrje mund të risjellë në vëmendje nevojën për hetime serioze dhe transparencë më të madhe në sektorin e përpunimit ushqimor në vend.
