Një ngjarje e rëndë ka tronditur familjen Rexhepaj në Sarandë, ndërsa institucionet vendore kanë hyrë në një “ping-pong” përgjegjësish për transportin e trupit të pajetë të Isa Rexhepajt drejt Tiranës, për autopsi.
65-vjeçari Isa Rexhepaj u gjet i vdekur në një kolibe peshkimi pesë ditë pasi kishte humbur kontaktet me familjen. Trupi i tij u zbulua mëngjesin e së premtes nga vëllai, i cili njoftoi menjëherë policinë.
Pas mbërritjes në vendngjarje, autoritetet kryen veprimet e para hetimore dhe trupi u transportua në morgun e spitalit të Sarandës. Megjithatë, edhe pse është kërkuar një ekspertizë më e thelluar mjeko-ligjore në Tiranë, trupi nuk është lëvizur ende nga Saranda.
Sipas familjarëve, kufoma ka nisur të dekompozohet për shkak të kohës së gjatë që ka kaluar pas vdekjes.
Vëllai i të ndjerit shprehet se spitali i Sarandës ia kalon përgjegjësinë Policisë së Shtetit, kjo e fundit thotë Prokuroria, ndërsa prokuroria pretendon se përgjegjësia i takon policisë.
“Vajta e mora, kishte katër ditë i vdekur. Lajmërova policinë, erdhi ambulanca dhe e çuan në morg vëllanë. Prokuroria thotë do ta çojmë në Tiranë, por ai nuk mund të çohet se i ka rënë mishi, është nxirë, vjen era kërmë. Jam këtu para morgut, nuk më japin trupin e vëllait. Prokuroria thotë e ka Policia, Policia thotë e ka spitali, spitali thotë e ka Policia. Nuk di çfarë të bëj, unë dua të varros vëllain, t’i bëj adetet e fundit”, është shprehur vëllai i viktimës për News24.
Familjarët kërkojnë që sa më parë të mund të marrin trupin e të ndjerit për ceremoninë mortore.
