Tre persona të kërkuar nga autoritetet janë ndaluar nga shërbimet e Policisë Kufitare në Sarandë gjatë kontrolleve në Pikën e Kalimit Kufitar Qafë Botë dhe në Portin e Sarandës.
Sipas informacioneve paraprake në Qafë Botë u prangos një 20-vjeçar nga Saranda, i cili rezultonte i shpallur në kërkim me masë sigurie “Arrest në burg” për veprat penale që lidhen me armëmbajtjen pa leje dhe prishjen e qetësisë publike. Sipas hetimeve, ai dyshohet se ka qëlluar me armë zjarri në ajër në një zonë të banuar të Sarandës, në bashkëpunim me persona të tjerë.
Po në këtë pikë kufitare u ndalua edhe një 27-vjeçar nga Divjaka, i kërkuar për veprën penale “Kanosje” nga autoritetet në Tiranë. Ndërkohë, në Portin e Sarandës u ndalua një 43-vjeçar me banim në Angli, i shpallur në kërkim kombëtar për veprën penale “Mashtrim”. Tre të ndaluarit iu dorëzuan strukturave përkatëse të Policisë për vijimin e procedurave ligjore.
