Ministri i Brendshëm i Gjermanisë, Alexander Dobrindt, dhe pesë homologë europianë ranë dakord të premten për të shtrënguar rregullat e azilit në bllok, duke përfshirë lejimin e deportimeve në Afganistan dhe Siri. Takimi vjen pas vendimit të Berlinit në maj për të refuzuar azilkërkuesit në kufi.
Ministri Dobrindt u takua me homologë nga Franca, Polonia, Austria, Republika Çeke dhe Danimarka, si dhe me Komisionerin e Çështjeve të Brendshme të BE-së, Magnus Brunner.
Objektivat e dakordësuara të politikës së azilit, të cilat kërkojnë miratimin e Brukselit, përfshijnë heqjen e pengesave legjislative për transferimin e azilkërkuesve të refuzuar në qendra të sigurta jashtë BE-së dhe mundësimin e procedurave të azilit në vendet e treta, një skemë e ngjashme kjo me protokollin Itali–Shqipëri.
Qeveria e re e Gjermanisë ka vendosur tashmë kufizime mbi migracionin, duke përfshirë pezullimin e programeve të ribashkimit familjar. Të premten, Gjermania deportoi 81 burra në Afganistan. “Këta janë kriminelë, kriminelë të rrezikshëm,” tha ministri i Brendshëm gjerman.
Dëbimet në vende si Afganistani dhe Siria duhet të rivendosen si praktikë standarde.
Tregtia dhe ndihma për zhvillim do të përdoren gjithashtu si levë për të rritur kthimet dhe për të forcuar bashkëpunimin për migracionin, thuhet në një dokument të lëshuar pas takimit. Ai bën thirrje për përdorimin e dronëve dhe më shumë fonde të BE-së për infrastrukturën dhe personelin kufitar.
Vendet ranë dakord të luftojnë kontrabandistët dhe të punojnë për të çmontuar rrjetet e trafikimit të qenieve njerëzore.
Azilkërkuesit që tashmë u është dhënë mbrojtje në një vend tjetër të BE-së do të refuzohen shpejt nëse kërkojnë azil diku tjetër në bllok.
