Kryedemokrati Sali Berisha, gjatë një konference për mediat, është pyetur në lidhje me ndryshimet që mund të bëhen në postet drejtuese në Partinë Demokratike.
Berisha u shpreh se “të gjitha do t’i merrni vesh”, duke paralajmëruar se ndryshimet në PD do t’i bëjë publike.
Ish-kryeministri u pyet edhe për Ervin Salianji, i cili ditën e djeshme u lirua me kusht, duke u shprehur se ish-deputeti tashmë ka dy funksione në parti.
Por, theksoi Berisha, “cilat do të jenë funksionet e ardhshme do e përcaktojë anëtarësia e PD-së”.
“Të gjitha do t’i merrni vesh. Ervin Salianjin kam komunikim të vazhdueshëm, tani do të vijë ta takojë. Kam komunikim të shpeshtë dhe të vazhdueshëm me të.
Salianji ai ka dy funksione të rëndësishme, cilat do të jenë funksionet e ardhshme do e përcaktojë anëtarësia e PD-së.
Salianji doli dhe dje, një i burgosur politik, një histori turpi e dyshes mafioz Ramaduros dhe Fatmir Geron Xhafës.
U dënua me burg në kundërshtim me Kushtetutën“, tha Berisha.
