Analisti Andi Bushati ka deklaruar se kryeministri Edi Rama po shndërron institucionet e pavarura, përfshirë SPAK-un dhe bashkitë, në mjete kontrolli politik.
Ai thekson se kjo rrugë kalon përmes shpëlarjes së trurit në media, që po promovojnë një “budallallëk njerëzor” dhe arrogancë të paprecedentë, duke paralajmëruar një linjë të qartë politike që synon monopolizimin total të pushtetit.
“Mediat që promovojnë budallallëkun njerëzor mbi gojën e Sala Miles apo Zegjinesë. Shpëlarja e trurit deri në promovimin e budallallëkut po jep sinjale që do kthehet në një linjë politike. Shiko pastaj arrogancën për të vendosur gjithçka.
Rama po përgatitet, po i merr lejet edhe bashkive. Shikoni ç’po bën me Bashkinë e Tiranës, që gjithashtu ishte një oaz i kontrolluar nga Rama, me vetëdije. Por me burgosjen e Veliajt me bekim politik, është kthyer fare në një zgjatim të Ramës. Pra, iu hoq e drejta Veliajt për të caktuar pasardhësin e tij.
Shikoni capo ndodh me SPAK-un. SPAK-u për mua gjithmonë ka qenë një mashë e Edi Ramës, por pas zgjedhjeve ka hequr edhe maskën. Pra, po të shikosh atë Task-Forcën e famshme, bëri para dy ditësh Dumani edhe një ekspoze, duket sikur votat i ka vjedhur opozita. Pra, arroganca e pushtetit dhe brerja e institucioneve të pavarura, po vazhdon.
Shikoni mediat. Qeshja para disa ditësh. Një nga këto mediat e qeverisë së Ramës kishte atë foton e Ramës në Samitin e NATO-s dhe thoshte ‘Eleganca shqiptare i mëson mbretërorëve holandezë elegancën’. Pra, kemi arritur deri në pikat kur thoshin ‘Ore çdo bënte bota po mos të kishte lindur Enver Hoxha’, që thoshin 40 vite përpara.”, tha Bushati në Syri TV.
