Hetimet e karabinierëve në Itali, të koordinuara nga Prokuroria, kanë zbuluar ferrin që përjetonin fëmijët në çerdhen privat “‘Albero dei Ragazzi” në qytetin Asti, ku fëmijët dhunoheshin, talleshin dhe poshtëroheshin
Agjencia e lajmeve “ANSA” raporton se nga pamjet e kamerave të instaluara dalin detaje të tmerrshme, ku disa fëmijë tërhiqeshin për t’i penguar të largoheshin nga vendi i tyre në tavolinë, të tjerë u ndëshkuan pa arsye dhe u detyruan të uleshin në dysheme në një cep, ndërkohë një fëmijë me origjinë shqiptare u ofendua dhe një fëmijë tjetër me ngjyrë thirrej vazhdimisht ‘Zulù’.
Gjithashtu, është zbuluar se një vajze të vogël i jepnin ushqime të marra nga plehrat për të ngrënë dhe sërish një nga mësueset kërkontenëpër çantat e shpinës për të “hequr” e “shijuar”, ushqimet personale të fëmijëve, pjatat e përgatitura nga nënat për fëmijët e tyre.
Mësuesit – nënvizojnë hetuesit – përdornin metoda brutale, të bërtitura e ofendime të vazhdueshme. Karabinierët vazhdojnë: “Ajo që është më e habitshme dhe egër në këtë histori të mjerë dhe të trishtuar është pikërisht ky vëzhgim: mungesa totale e një atmosfere gazmore dhe lozonjare, e zëvendësuar nga frika, terrori dhe ankthi i vazhdueshëm”.
Gjyqtari i Gjykatës së Astit ka vendosur ndaj dy edukatoreve masën e sigurimit ndalim të përkohshëm të ushtrimit të profesionit mësues në shkollat e të gjitha niveleve për veprën penale të keqtrajtimit në konkurrim ndaj të miturve që u janë besuar. Hetimet janë në vazhdim.
