Presidenti Donald Trump ka mbrojtur vendimin e tij për të dërguar marinsat amerikanë dhe Gardën Kombëtare të Kalifornisë në Los Angeles për të shtypur protestat kundër Shërbimit të Emigracionit dhe Doganave, ICE, duke deklaruar se shkatërrimi do të kishte qenë shumë më i madh nëse nuk do të kishte ndërhyrë.
“Nëse nuk do të kisha dërguar trupat në Los Angeles gjatë tre netëve të fundit, ai që dikur ishte një qytet i bukur dhe i madh do të ishte djegur plotësisht, ashtu siç u dogjën 25,000 shtëpi në Los Angeles, për shkak të një guvernatori dhe kryebashkiakje të paaftë,” shkroi Trump në rrjetet sociale.
Tensionet vazhduan të përshkallëzohen për të katërtën natë radhazi, me protestuesit që u përplasën me forcat e rendit, vandalizuan ndërtesa dhe dogjën automjete në qendër të qytetit.
Trump ka dërguar 4,000 pjesëtarë të Gardës Kombëtare të Kalifornisë dhe 700 Marinsa në qytet.
Guvernatori i Kalifornisë, Gavin Newsom dhe kryetarja e bashkisë së Los Angeles-it, Karen Bass, të dy demokratë, kanë kundërshtuar praninë ushtarake, duke thënë se ajo është e panevojshme dhe vetëm përshkallëzon tensionet.
Newsom dhe Prokurori i Përgjithshëm i Kalifornisë, Rob Bonta, kanë ngritur një padi kundër administratës Trump, duke pretenduar se federalizimi i Gardës Kombëtare të shtetit ka shkelur sovranitetin e Kalifornisë.
Trump ka reaguar ndaj kritikave, duke akuzuar Newsom dhe Bass për keqmenaxhimin e procesit të lejeve për rindërtimin e shtëpive pas zjarreve masive të janarit.
Të dielën, Newsom ka nënshkruar dy urdhra ekzekutivë për të përshpejtuar procesin e rindërtimit, mes ankesave të banorëve se ai po vonohej shumë.
Në Pacific Palisades, një zonë e shkatërruar nga zjarret, më shumë se 200 pronarë kanë dorëzuar aplikime për të rindërtuar ose riparuar shtëpitë e tyre, por vetëm 11% e tyre janë miratuar, sipas të dhënave të Los Angeles Times.
“Procesi federal i lejeve, shumë më i vështirë dhe më i rreptë, është pothuajse i përfunduar për këto shtëpi, ndërsa lejet e qytetit dhe shtetit janë një katastrofë e vërtetë dhe shumë prapa afatit! Njerëzit duan të rindërtojnë shtëpitë e tyre. Telefononi guvernatorin dhe kryetarin tuaj të paaftë, lejet federale janë TË PËRFUNDUARA!!” shkroi Trump në rrjetet sociale.
Ky zhvillim ka ndezur një debat të madh mbi ndërhyrjen federale në çështjet shtetërore dhe përdorimin e forcave ushtarake për të kontrolluar protestat. Situata në Los Angeles mbetet e tensionuar.
