Sekretari amerikan i Shëndetësisë, Robert F. Kennedy Jr., ka shkarkuar të gjithë anëtarët e një prej komiteteve më të rëndësishme këshilluese për vaksinimin, një veprim i paprecedentë që pritet të sjellë ndryshime të ndjeshme në politikat e imunizimit në SHBA.
Departamenti i Shëndetësisë dhe Shërbimeve Njerëzore njoftoi të hënën se 17 anëtarë të Komitetit Këshillues për Praktikat e Imunizimit janë larguar nga detyra.
Ky komitet ka rol kyç në rekomandimin e dozave të vaksinave për popullatën amerikane.
Kennedy, i njohur për qëndrimet e tij skeptike ndaj vaksinave, deklaroi se ky riformatim synon të rikthejë besimin e publikut në komitet, duke akuzuar anëtarët e mëparshëm për konflikte interesi.
“Komiteti nuk do të funksionojë më si një vulë formale për interesat fitimprurëse të industrisë”, tha Kennedy në një deklaratë zyrtare.
Ai shtoi se shumica e anëtarëve ishin emëruar nga ish-Presidenti Joe Biden vitin e kaluar, me mandate që zgjasnin deri në vitin 2028.
Komiteti përbëhet nga deri në 19 anëtarë me të drejtë vote, profesionistë të shëndetësisë dhe mjekë të pavarur që nuk janë punonjës të qeverisë.
Ai koordinohet nga Qendrat për Kontrollin dhe Parandalimin e Sëmundjeve (CDC) dhe mblidhet zakonisht tri herë në vit. Në të marrin pjesë edhe organizata pa të drejtë vote, si Shoqata Amerikane e Mjekësisë.
Zëdhënësja e Departamentit të Shëndetësisë nuk konfirmoi nëse janë përzgjedhur anëtarë të rinj për komitetin. Takimi i radhës i komitetit pritet të mbahet këtë muaj.
Në një raport të publikuar në maj nga komisioni “Make America Healthy Again”, Kennedy vuri në dyshim sigurinë e vaksinave, duke theksuar se fëmijët amerikanë sot marrin më shumë vaksina se në dekadat e mëparshme.
Ai shtoi se ndonëse të gjitha 50 shtetet amerikane kanë mandate për vaksinim në shkollat publike, shumë vende evropiane, përfshirë Mbretërinë e Bashkuar, nuk i kërkojnë vaksinat për fëmijët.
Qasja kritike e Kennedyt ndaj vaksinave ka ndikuar ndjeshëm edhe në industrinë farmaceutike.
Aksionet e kompanisë Moderna, e njohur për vaksinën kundër Covid-19, janë ulur me 32% këtë vit, ndërsa ato të Pfizer ranë gati me 10%.
