Gani Shkalla, një qytetar nga Tirana tregon në emisionin “Stop” se ka kërkuar që të zhvendosë matësin elektrik nga kati sipër te korridori, në katin ku banon ai vetë.
Ganiu thotë se matësi është bërë shkak për konflikt me fqinjin sipër. Sa herë që i ndodhin defekte nuk shkon dot te matësi, pasi komshiu i mbyll portën me kyç.
Gani Shkalla, denoncues: Dua që të lëvizet sahati nga kati sipër te korridori te kati ku banoj unë. Arsyeja që e kërkoj këtë gjë është se kam konflikt me fqinjin sipër. Sa herë që ndodhin defekte nuk shkoj dot te sahati sepse ai mbyll portën me kyc.
Ganiu ka shkuar në zyrat e OSHEE-së në ish-Kinostudio dhe ka paguar 2500 lekë për zhvendosjen e matësit. Kur ka ardhur grupi i punës për ta realizuar, i kërkuan të blinte vetë edhe kabëllin.
Gani Shkalla, denoncues: Pasi pagova tarifën prej 2500 lekësh te shërbimi këtu në ish-Kinostudio, erdhi grupi dhe më kërkoi kabëll. E gjeta dhe kabëllin por më pas më thanë që kjo gjë nuk mund të bëhet dhe ikën. Vjedhje e quaj këtë unë.
Pasi e siguroi edhe kabëllin, punonjësit e OSHEE-së i thanë që zhvendosja e matësit elektrik nuk mund të bëhej sepse është jashtë kushteve teknike.
Përgjegjësi: Gani, nga boksi në ambient privat ashtu nuk bëhet, mos u lodh. Shko, ku të duash ankohu!
Gani Shkalla, denoncues: Mirë, po pse nuk bëhet?
Përgjegjësi: Ta sqarova! Nuk bëhet, pra, sepse është jashtë kushteve teknike, sepse ai është pallat, boksi është kolektiv dhe nuk ka shance të bëhet.
Gani Shkalla, denoncues: Unë kam paguar lekët!
Përgjegjësi: Shko ankohu atje te ai që të ka marrë ankesën, të të kishte sqaruar që në fillim. Për gabimin, duhet të shkosh te zyra e kujdesit ndaj klientit se pse është marrë kjo ankesë sepse ata e dinë shumë mirë që s’mund ta spostosh boksin nga kolektiv ta çosh në mënyrë individuale.
