Policia italiane njoftoi sot se ka ekstraduar të shumëkërkuarin shqiptar Kevin Kurti, i cili ishte arrestuar gjatë një operacioni në muajin shkurt të këtij viti në Durrës.
Mediat italiane shkruajnë se ‘kumbari’ i marrëveshjeve të drogës mes grupeve kriminale të trafikut nga Napoli në Kalabri, është dorëzuar në sekret të plotë operacional nën pranga në Rinas, agjentëve të Interpol Romës.
“Kevin Kurti, një 37-vjeçar i kërkuar ndërkombëtarisht, zbarkoi në aeroportin e Romës Fiumicino me një aeroplan, ndërsa ishte kapur në Durrës. Ai i kishte shpëtuar kapjes gjatë arrestimeve të 17 janarit nga Karabinierët e Njësisë Hetuese të Napolit, në zbatim të një urdhri për zbatimin e një mase paraprake në burg të lëshuar nga GIP i Napolit, me kërkesë të Drejtorisë së Qarkut Antimafia, si pjesë e hetimit të quajtur konvencionalisht “Liga e Kampionëve“, informon media e vendit fqinj.
Kurti është ndër 29 të dyshuarit e përfshirë, në kapacitete të ndryshme, në importimin në shkallë të gjerë të narkotikëve nga Holanda dhe Spanja në zonat më të lulëzuara të trafikut të drogës në provincën e Napolit.
Trafikimi i drogës menaxhohej përmes bisedave dhe telefonave të koduar, të konsideruara fillimisht si “të paprekshëm”.
“37-vjeçari – i kapur në Durraco natën e 5 shkurtit nga Policia e Shtetit e Republikës së Shqipërisë si pjesë e aktivitetit të përbashkët të Karabinierëve të Njësisë Hetuese të Napolit, me shërbimin për Bashkëpunim Ndërkombëtar Policor të Drejtorisë Qendrore të Policisë Kriminale dhe Europolit, u soll në Itali”, vijon artikulli.
Sipas hetimeve, bëhej fjalë për dy organizata kriminale që vepronin në territorin napolitan, të dedikuara për trafikimin e organizuar të narkotikëve, jo të lidhura funksionalisht me njëra-tjetrën, por që kanë të njëjtin kanal furnizimi të lëndës narkotike (kryesisht kokainë dhe kanabis), të menaxhuara në Spanjë.
“Këtë mëngjes (3 qershor) Kurti mbërriti në Itali, i shoqëruar nga personel i Shërbimit për Bashkëpunim Ndërkombëtar Policor. 37-vjeçari u dorëzua më pas nga autoritetet shqiptare tek ato italiane, në ekzekutim të vendimit të lëshuar nga gjyqtari hetues i Gjykatës së Napolit dhe më pas iu nënshtrua masës së arrestit shtëpiak në dispozicion të DDA-së së Napolit”.
Shqiptari konsiderohet “kumbari” rreth të cilit u rrotullua marrëveshja midis Simone Bartiromo, një element kryesor i organizatës dhe Sebastiano Romeo, një “furnizues” kalabrez kokaine.
Gjurmimet e shqiptarit e lokalizuan atë të fshehur në qytetin e Durrësit, ku dhe u prangos për qëllime ekstradimi.
