Policia e Durrësit ka zbardhur atentatin e regjistruar mbrëmjen e djeshme në qytetin, bregdetar, ku u qëllua me armë zjarri 36-vjeçari Arbër Goreja, teksa ishte duke lëvizur me makinë në aksin rrugor “Katër Rrugët e Fllakës–Katund Sukth”.
Si autor i ngjarjes është identifikuar shtetasi Kidi Kazazi, 30 vjeç, banues në Kavajë, por ai ende nuk është arrestuar dhe është shpallur në kërkim nga Policia. Sipas Policisë, në momentin kur është qëlluar me armë zjarr, Arbër Goreja ka qenë në automjet me dy fëmijët e tij të mitur.
“Nga hetimet paraprake rezulton se rreth orës 19:30, të datës 30.05.2025, në vendin e quajtur “Fllakë e Egër”, shtetasi Kidi Kazazi, duke lëvizur me automjetin tip “Ford Focus”, ka qëlluar me armë zjarri të dyshuar pistoletë, gjatë një parakalimi, drejt automjetit tip “Lancia”, në të cilin ndodhej shtetasi Arbër Goreja, 36 vjeç, banues në Durrës. Si pasojë, shtetasi Arbër Goreja mbeti i plagosur, ndërsa dy të miturit 14 e 15-vjeç që udhëtonin me të nuk kanë pësuar lëndime.” – thuhet në njoftimin e Policisë
Dyshohet se shkaku i atenatit dyshohet se ka qenë një konflikt i pak ditëve më parë, ku Arbër Goreja ka dhunuar babain e atentatorit Kidi Kazazi, shtetasin Eqerem Kazazi.
“Nga hetimet ka rezultuar se disa ditë më parë, shtetasi Arbër Goreja, ka ushtruar dhunë fizike ndaj babait të shtetasit Kidi Kazazi, i cili ka pësuar dëmtime fizike jashtë rrezikut për jetën.” – njoftojnë blutë e qytetit bregdetar.
Burime për mediat bëjnë me dije se në drejtim të Arbër Goreja u qëllua tre herë me armë zjarri dhe mori një plumb në brinjë, ku iu nënshtrua një ndërhyrje kirurgjikale dhe ndodhet jashtë rrezikut për jetën.
Në dëshminë e dhënë për grupin hetimor, Arbër Goreja e mohoi se kishte konflikte me dikënd, pavarësisht se vetëm pak ditë më parë kishte dhunuar babain e Kidi Kazazit.
“Isha duke ardhur nga Fllaka për në Durrës. Në një moment mu afrua një makinë Ford i bardhë me portobagazh. Në ecje e sipër më erdhi paralel dhe më qelloi tri herë me pistoletë. Mua me kapi një plumb në brinjë. Fillimisht nuk e kuptova pasi trupi ishte i ngrohtë. Më pas më nisi dhimbja. U tremba dhe me shpejtësi erdha në komisariat. Makina më ndoqi disa metra dhe më pas ndaloi. Nuk e njihja personin që më qëlloi. Unë nuk kam konflikte të kalura me persona të tjerë. Ndoshta më kanë ngatërruar me ndonjë person tjetër.” – tha ai për Policinë. Arbër Goreja kishte mbetur i plagosur edhe në një atentat të mëparshëm.
Ndërkohë, mësohet se Kidi Kazazi është ish-kreu i FRPD-së së Kavajës, i cili po ashtu ka mbetur i plagosur në një ngjarje të vitit 2016, ku Sajmir Kurti e plagosi së bashku me babain dhe një person tjetër.
Policia thotë se vijon puna hetimore në bashkëpunim me Prokurorinë për dokumentimin e plotë ligjor të ngjarjes, si dhe po vijojnë punën për lokalizimin dhe kapjen e autorit të dyshuar, Kidi Kazazi.
Materialet i kanë kaluar Prokurorisë Durrës, për veprime të mëtejshme procedurale.
