Në vijim të kontrolleve të territorit në kuadër të operacionit të koduar “Koordinata”, Policia ka zbuluar të tjera parcela me kanabisi.
Nga kontrollet e fundit të ushtruara raportohet se janë gjetur dhe asgjësuar gjithsej 1 233 fidanë e bimë kanabisi ( 777 fidanë dhe 456 bimë narkotike kanabis). Gjithesi, ende nuk dihet se kush është kultivuesi i tyre dhe nuk ka asnjë të arrestuar.
Më konkretisht, në territorin e njësive administrative Shalë, Pult dhe Postribë janë gjetur 777 fidanë dhe 382 bimë narkotike kanabis. Në vijim të veprimeve për këto dy raste, raportohet se ka nisur procedimi në gjendje të lirë, për shpërdorim të detyrës dhe moskallëzim krimi, për Inspektorin e Pyjeve, shtetasin A. M dhe Rojen Mjedisore shtetasin L. A.
Ndërkohë shërbimet e Komisariatit të Policisë Malësi e Madhe gjatë kontrolleve kanë gjetur në territorin e njësisë administrative Shkrel, 74 bimë kanabisi.
Policia thotë se vijon puna për identifikimin, kapjen dhe nxjerrjen përpara përgjegjësisë penale të autorëve të kultivimit të këtyre bimëve narkotike.
