Nënkryetari i Partisë Demokratike, Oerd Bylykbashi, deklaroi se fillimisht PD duhet të faktojë farsën elektorale, më pas të bëjë analizën dhe në fund duhet të dalin përgjegjësitë.
“Duhet së pari t’i çojmë të gjitha ankimet në KQZ, që po e bëjmë tani, t’i çojmë të gjitha faktet dhe provat në OSBE-ODIHR, Këshillin e Europës, që ta marrë bota vesh se cilat ishin zgjedhjet në Shqipëri. Dhe e treta, analiza, më pas përgjegjësia me votë”.
Bylykbashi, drejtuesi i qarkut të Durrësit, i cili ishte në listën e mbyllur të këtij qarku, deklaroi se, pavarësisht rolit të krimit, ky qark ruajti rezultatin 8 me 6.
“Ka ardhur 8 herë Edi Rama në Durrës, ka dhënë porosi. Komisarin e lidhjes së krimit me shtetin, Agasin, e kishe në funksion të plotë.”
Bylykbashi theksoi se ky sistem zgjedhor duhej zhbërë me kohë.
“Ky sistem zgjedhor duhej të zhdukej në vitin 2020. Ky nuk është 2008-ta. Ky është hibridi toksik i vitit 2020, i Edi Ramës dhe Damian Gjiknurit”.
