Një ditë më parë, Antimafia italiane në bashkëpunim me SPAK-un goditën një organizatë me bazë në Durrës të trafikimit në sasi të mëdha të kokainës dhe heroinës drejt Italisë dhe vendeve të tjera të Europës.
Në total u lëshuan 52 masa sigurie, ku 40 prej tyre janë për shtetas shqiptarë dhe 12 të tjera për shtetas italianë, teksa në krye të grupit dyshohet se qëndronte Xhevdet Troplini, i njohur si “Poja”, dhe dy bashkëpunëtorët e tij më të ngushtë Elvis Doçi dhe Adi Çoba.
Për goditjen e kësaj organizate, autoritetet italiane u bazuan në komunikimet e “Sky Ecc”, si dhe në dëshmitë e tre të penduarve të drejtësisë, ku një prej tyre është Nuredin Dumani.
Ky i fundit para hetuesve italianë ka treguar se trafikantët e drogës përdorin linjat e ndryshme të transportit ndërkombëtar për të lëvizur paratë e tyre, kryesisht, për t’i futur në Shqipëri, fitimet e realizuara jashtë vendit.
P.M. DOTT. CARDINALI: Për këto ngarkesa, si arrinin paratë te ata që shisnin drogën? I paguanit më parë?
NUREDIN DUMANI: “Ishte shumë e thjeshtë. Pagesa e parave ishte shumë e thjeshtë dhe mund ta shpjegoj. Kur paratë lëvizin nga Italia në Shqipëri ose nga Shqipëria në Itali, për të mos rrezikuar, duhet të paguash agjencitë e udhëtimit, siç janë autobusët ose minibusët. Transporti mund të bëhet edhe personalisht, domethënë mund ta bëj unë duke blerë një makinë të shtrenjtë dhe atë makinë mund ta çoj me tokë ose me traget. Por kështu është e rrezikshme. ..
Sipas Dumani, shoferët e autobusëve, që marrin përsipër transportin e parave përfitojnë një përqindje mbi shumën që transportojnë. Më konkretisht, sipas tij, shioferët marrin 12% të shumës për t’i transportuar paratë nga Italia drejt Shqipërisë dhe 4 % për anasjelltas.
NUREDIN DUMANI: “…Me autobusin paguaje 10% ose 12% të shumës. Ndërsa nga Shqipëria për t’i çuar në Itali është rreth 3-4%, është më e lehtë.”
TEN.COL. OCCHIOGROSSO: Shoferët e autobusëve marrin një përqindje për transportin?
NUREDIN DUMANI: “Po. Qoftë edhe nëse paratë kapen, qoftë edhe nëse nuk kapen, ti duhet t’i paguash… sepse kjo është çështje e autobusit.”
TEN.COL. OCCHIOGROSSO: Pra, rreziku mbetet…
NUREDIN DUMANI: ” Ja pse marrin 12%.”
TEN.COL. OCCHIOGROSSO: Ah, në rregull. Dhe mund të tregosh cilat janë këto kompani të autobusëve?
NUREDIN DUMANI: “Të gjitha.”
TEN.COL. OCCHIOGROSSO: Të gjitha?
NUREDIN DUMANI: “Po, po.”
Në dosjen e zbardhur të autoriteteve italiane, Nuredin Dumani thotë se përmes kësaj mënyre grupet kriminale kanë kaluar shumë që shkonin deri në 500 mijë euro, për një rrugë.
Zbërthimi i bisedave që drejtuesë dhe pjestarë të organizatave kriminale kryenin përmes telefonave të enkriptuar, ishin një ndihmesë dhe në hetimet e grupit të goditur së fundmi në bashkëpunim me palën italiane. Sipas të penduarit Dumani, telefonat e koduar gjendeshin lehtësisht në Tiranë.
PROKURORI DOKTOR CARDINALI: Kush i siguronte këta telefona?
NUREDIN DUMANI: “Këtu në Tiranë. Disa dyqane. Unë kam treguar për ato dyqane. Është shumë e lehtë.”
Sipas tij çmimet shkonin deri në 2 mijë euro.
PROKURORI DOKTOR CARDINALI: Sa kushtonte?
NUREDIN DUMANI: “Deri në dy mijë euro.”
PROKURORI DOKTOR CARDINALI: Telefoni?
NUREDIN DUMANI: “Telefoni dhe aplikacioni për gjashtë muaj.”
PROKURORI DOKTOR CARDINALI: Pra telefoni dhe programi dy mijë euro për gjashtë muaj?
NUREDIN DUMANI: “Po, për gjashtë muaj. Pastaj ra çmimi deri në 1300 euro, 1400 euro.”
