Mandatet në zgjedhjet parlamentare të 11 Majit u ndanë në 83 për Partinë Socialiste dhe 50 për demokratët, 3 për Partinë Social-Demokrate, 2 për Partinë Mundësia dhe 1 mandat për Nisma Shqipëria Bëhet dhe 1 për Lëvizjen Bashkë.
Në 2013 grupi parlamentar i PD ka patur 49 deputetë, 52 bashkë me aleatët, në 2017-ën, 43 deputetë dhe në zgjedhjet e vitit 2021 dolën 59 deputetë demokratë dhe 4 për Lëvizjen Socialiste për Integrim.
Një pjesë e votave të humbura të demokratëve duket se janë shpërndarë në forcat e e reja apo partitë e vogla që po hyjnë në parlament.
Sistemi zgjedhor për to duket se është i padrejtë jo vetëm për kushtet e garës, por dhe për mënyrën se si shpërndahen mandatet në raport me numrin e votave.
Forca me votuar rezulton Nisma Shqipëria Bëhet, një koalicion i drejtuar nga Adriatik Lapaj dhe Endri Shabani, e cila ka marrë 64 mijë vota, por ka arritur të nxjerrë vetëm 1 deputet në Tiranë. Koalicioni ka arritur të marrë 7.4% të votave të diasporës dhe në disa qarqe si Fieri dhe Vlora arritja e votave për të marrë një mandat ka patur një diferencë të ngushtë.
Forcë e katërt rezulton Partia Socialdemokrate e drejtuar nga Tom Doshi, e cila ka marrë 49.887 vota dhe ka rritur të prodhojë 3 mandate deputetësh, 1 në qarkun e Tiranës dhe 2 në Shkodër.
Mundësia e Agron Shehaj ka marrë 49 mijë vota dhe ka nxjerrë 2 mandate në Tiranë, ndërsa Lëvizja Bashkë e Arlind Qorrit ka marrë 24621 vota dhe ka nxjerrë si përfaqësues në kuvend kandidatin e listuar të parin për Tiranën Redi Muçi, ndërsa partia do të vazhdojë të drejtohet nga Arlind Qorri.
Në total partitë e reja kanë arritur që të marrin 220 841 vota në këto zgjedhje, ku nëse zbresim votat e PSD një parti e vjetër dhe që ka patur përfaqësim më parë në Kuvend, janë 171 mijë shqiptarë që kanë votuar për lëvizjet e reja. Numri rezulton me rritje të lartë krahasuar me vitin 2021, ku votat për partitë jo tradicionale janë dyfishuar.
Emisioni “Kronos” në MCN TV, kujton se në vitin 2021 ishin 110 mijë vota për partitë e reja bashkë me PSD dhe 60 mijë pa partinë Socialdemokrate. Sistemi zgjedhor i bazuar në formulën d’Hont, ka favorizuar partitë më të mëdha për të nxjerrë më shumë mandate. Formula nuk është e bazuar as në votë kombëtare, por rajonale, e cila e bën të vështirë dhe ndonjëherë absurd shpërndarjen e mandateve dhe votave.
Ka raste kur forcat politike mund të kenë marrë më shumë vota totale, por më pak mandate dhe nuk kanë arritur të qeverisin. Në raste të tjera diferenca për nxjerrjen e një mandati është gati e pamundur- e në raste të tjera shumë e ngushtë. Pavarësisht nga numri i votave që ndan një mandat, forca të ndryshme e fitojnë atë me numër të ndryshëm votash.
Partia Socialiste ka arritur që të nxjerrë 1 mandat për 10 313 vota, demokratët për 10 580 vota, ndërsa partia që është diskriminuar më shumë nga sistemi zgjedhor është Nisma Shqipëria Bëhet e cila për 64 mijë vota ka nxjerrë vetë 1 mandat.
Partia Mundësia ka nxjerrë 1 mandat për 24500 vota, Partia Socialdemokrate ka nxjerrë mandatin për 16629 vota dhe Lëvizjes Bashkë e ka marrë mandatin për 24621 vota.
Koalicioni Euroatlantik i udhëhequr nga Lulzim Basha ka marrë në rang kombëtar 20854 vota, por nuk ka arritur të sigurojë asnjë mandat, asnjë mandat nuk kanë arritur të prodhojnë dhe Djathtas për Zhvillim të cilët kanë siguruar në total 6022 vota.
Diferenca për të nxjerrë një ulëse në Kuvend në bazë të numrit total të votave me sistemin propocional rajonal është dukshëm e ndryshme nga partia që siguron numrin më të madh të votave me atë që siguron numrin më të ulët. Raporti në numër votash mes Partisë Socialiste dhe Nismës Shqipëria Bëhet është 6 me 1, pra për të njëjtën sasi votash PS nxjerr 6 deputetë dhe Koalicioni Lapaj-Shabani 1. Diferenca ngushtohet me partitë e tjera, por aksioma se më i madhi fiton më shumë në mënyrë jo-propocionale mbetet.
Si do të ishin shpërndarë mandatet e deputetëve me këtë numër votash nëse sistemi do të ishte mazhoritar kombëtar me pragun 1% të marrjes së numrit total të votave për të hyrë në kuvend?
Partia Socialiste nuk do të merrte 83 mandate, por 10 më pak, 73. Partia Demokratike do të merrte 48 mandate, Nisma Shqipëria Bëhet 6 përfaqësues në kuvend, Mundësia 4 deputetë, Partia Socialdemokrate 5, Lëvizja Bashkë 2 deputetë dhe Koalicioni Euroatlantik po ashtu 2 deputetë.
