Është gjetur në Grenlandë trupi i Ralph Salvinit, një shtetasi italian 45-vjeçar që humbi jetën në një aksident ajror të ndodhur më 25 tetor pranë Nuuk-ut, kryeqytetit të vendit.
Rrënojat e avionit privat që i përkiste vetë atij dhe që ishte nisur nga Kanadaja, u zbuluan vetëm orët e fundit, së bashku me trupin e pilotit.
Lajmin e ka bërë të ditur Ministria e Jashtme italiane, duke sqaruar se rrënojat dhe trupin e bashkatdhetarit i kanë identifikuar autoritetet vendase.
Sipas faqes së CBC (Canadian Broadcasting Corporation), avioni ishte zhdukur gjatë fluturimit mes Happy Valley–Goose Bay (në provincën kanadeze të Newfoundland dhe Labrador) dhe Grenlandës. Sipas Naviair, kompanisë shtetërore daneze që ofron shërbime të trafikut ajror, avioni u lokalizua pa asnjë të mbijetuar në bord.
Autoritetet kishin kërkuar avionin gjatë gjithë fundjavës pas zhdukjes, duke u përqendruar në zonën malore të Sermitsiaq, rreth 15 kilometra në verilindje të Nuuk-ut.
Megjithatë, kërkimet ajrore u pezulluan të shtunën për shkak të dukshmërisë së ulët dhe kushteve të vështira atmosferike, për t’u rifilluar të dielën me mjete detare.
