Kolegji i Posaçëm i Apelimit, KPA vendosi të hënën më 19 maj të lërë në fuqi shkarkimin nga detyra të prokurores së Shkodrës, Françeskina Lekani. Vendimi u mor në mënyrë unanime nga trupi gjykues i Kolegjit i kryesuar nga gjyqtarja Natasha Mulaj, me relatore Ina Rama dhe anëtarë Albana Shtylla, Rezarta Schuetz e Sokol Çomo, pas shqyrtimit në dhomë këshillimi të ankimit të Lekanit ndaj vendimarrjes së Komisionit. Vendimi i Kolegjit është përfundimtar dhe me efekt të menjëhershëm.
Prokurorja Françeskina Lekani u shkarkua nga detyra prej Komisionit të Pavarur të Kualifikimit, KPK më 6 dhjetor 2023 për probleme në kriterin e pasurisë dhe atë të profesionalizmit. Për figurën, ajo u vlerësua pozitivisht.
Françeskina Lekani e nisi karrierën në sistemin e drejtësisë në vitin 1994 si prokurore ushtarake dhe prej vitit 2004 e deri në shkarkimin nga detyra punoi në Prokurorinë e Rrethit Gjyqësor Shkodër, ku së fundmi ushtroi dhe rolin e zëvendësdrejtueses.
