Analisti Andi Bushati, i ftuar në emisionin “Të Paekspozuarit” në MCN TV, ka deklaruar se rezultati zgjedhor nuk ishte ndonjë surprizë dhe për të fitorja e thellë e Ramës dihej, pasi kishte në dorë jo vetëm pushtetin, por edhe krimin dhe SPAK.
“Për mua nuk kishte ndonjë surprizë. Isha i bindur që do të kishte votime dhe jo zgjedhje. Në njëfarë mënyrë doli. Doli ana e dukshme e ajsbergut, raporti paraprak i OSBE/ODHIR që thotë zgjedhje në kushte të pabarabarta, intimidim i administratës, blerje vote, media që ushqehen me para publike. Nuk flitet për mjedis demokratik të zhvillimit të zgjedhjeve. Kjo është vetëm ana e dukshme e ajsbergut.
E padukshmja? Votat e marra me kriminelë. U bë refren ai rasti i asaj vajzës së Elbasanit me numër rekord votash. Këtë herë Rama dhe Rilindja kanë zgjedhur një strategji, je ti bandë kriminale, mos voto PS, që unë të provoj votat në këmbim të asaj që do marrësh, ti katapulto një anonim. Pra në disa qarqe kemi anonimë që janë bërë rekordmenë votash. Përdorimi i bandave kriminale për vjedhje votash.
E dyta, këta nuk vodhën votën vetëm të tjerëve, Lëvizjes Bashkë, Lapajt dhe Shehajt, por edhe vetë njëri tjetrit.
Asnjë socialist nuk e mendon dot që në kushte të barabarta, Majko merr një të dhjetën e ministrit të brendshëm që njerëzit nuk i dinë emrin akoma.
I duan kaq shumë? Apo janë metoda të tjera që janë vënë në lojë. Nuk kanë përdorur vetëm këtë. Rezultatin e Ramës e shumëfishoi fakti që për herë të parë kishte në dorë kërbaçin e drejtësisë së re dhe SPAK. Ose ka shkallmuar SPAK dhe drejtësia e re çdo lloj kundërshtari të Ramës. Merr faktin më të thjeshtë, Meta para 4 vitesh kishte 3000 vota, sot u katandis me 1700. Sot është i burgosur që ngjall mëshirë.
Meta merr si LSI-stë aq vota sa merr Braimllari në listën e PS. Të shkatërrosh një parti me 100 mijë vota, me mashën e bashibozukëve të SPAK, do të thotë se ke futur edhe faktorë të tjerë në lojën e madhe. Pjesa që e vërteton këtë, është që ka që të hënën që nuk bëhet ky debat, por thonë, humbi Berisha, do ikë apo jo, plaku… Nuk bëhet analiza themelore, kishim zgjedhje apo votime? Pastaj të marrin faktorët e tjerë, Berishën, Arlindin, Metën, Lapajn. Të gjykosh dikë si garoi në zgjedhje, duhet të dish a kishte kushtet minimale për të garuar”, tha Bushati.
