Politologu Ilir Kalemaj, në MCN tha se fushata e Edi Ramës është ndërtuar mbi një imazh të personalizuar, duke lënë në hije Partinë Socialiste.
Sipas tij, deklaratat kontradiktore për mandatet dhe taktikat për të demotivuar votuesit opozitarë tregojnë pasiguri dhe përpjekje për kontroll elektoral. Ai shtoi se premtimet për integrimin në BE nuk mbështeten në arritje konkrete, duke theksuar se Shqipëria nuk ka mbyllur ende asnjë kapitull negociatash.
“Gjatë fushatës zgjedhore, Edi Rama ka dhënë deklarata të ndryshme mbi numrin e mandateve që synon, nga 71 deri në 120, gjë që tregon ose luhatje humori, ose pasiguri për një pjesë të elektoratit. Këto deklarata shpesh janë interpretuar si pjesë e një loje politike, ku përfshihet edhe përpjekja për të demotivuar votuesit opozitarë. Një reagim ndaj kësaj taktike erdhi edhe nga Ambasada Amerikane, e cila theksoi rëndësinë e votimit të lirë dhe pa frikë.
Rama ka zhvendosur vëmendjen nga Partia Socialiste drejt vetes, duke zhdukur simbolikën e partisë dhe ndërtuar një fushatë tërësisht të personalizuar. Listat për deputetë janë mbushur me figura të ardhura nga parti të tjera, shpesh të përfshira në skandale, ku përparësi ka besnikëria ndaj Ramës dhe jo ideologjia. Ndërkohë, administrata publike është përfshirë në praktika klienteliste dhe presioni për të sjellë vota është bërë normë.
Sa i përket rrugës drejt BE-së, Rama e paraqet veten si të vetmin garant, por faktet tregojnë se Shqipëria nuk ka mbyllur asnjë kapitull negociatash, ndryshe nga Mali i Zi dhe Serbia që kanë bërë më shumë përparim. Premtimi i anëtarësimit në vitin 2030 shihet si i pabazuar, ndërsa kërkesa për një mandat të pestë mbështetet më shumë në propagandë sesa në arritje konkrete.”, tha Kalemaj.
