Kolegji i Posaçëm të Apelimit, KPA vendosi të mërkurën më 7 maj lënien në fuqi të vendimit të Komisionit për shkarkimin nha detyra të prokurorit të Vlorës, Alfred Sali. Vendimi u mor në mënyrë unanime nga trupi gjykues i Kolegjit, i kryesuar nga Natasha Mulaj, me relatore Albana Shtyllën dhe anëtarë Mimoza Tasi, Rezarta Schuetz e Sokol Çomo, pas shqyrtimit në dhomë këshillimi të ankimit të Salit ndaj vendimarrjes së Komisionit. Vendimi i Kolegjit është përfundimtar dhe ka efekt të menjëhershëm.
Komisioni i Pavarur i Kualifikimit, KPK vendosi më 22 korik 2022 të shkarkojë nga detyra prokurorin e Vlorës, Alfred Sali, pasi u konkludua se kishte kryer deklarim të pasaktë dhe të pamjaftueshëm të pasurisë. Po ashtu, përfshirja e prokurorit në lojëra fati u vlerësua se ka sjellë cënimin e besimit të publikut tek drejtësia.
Ndërkohë, Sali mori vlerësim pozitiv për pastërtinë e figurës dhe u konsiderua i aftë profesionalisht.
Alfred Sali përfundoi studimet në Shkollën e Magjistraturës në vitin 2004 dhe u emërua prokuror në Prokurorinë e Gjirokastrës, Prej vitit 2011 dhe deri në shkarkimin e tij nga detyra, Sali e ushtroi funksionin në Prokurorinë e Rrethit Gjyqësor Vlorë.
