Vetëm pak orë përpara sfidës më të rëndësishme të sezonit, Interi është zhytur plotësisht në atmosferën e madhe të përballjes së nesërme ndaj Barcelonës në ‘San Siro’, pas barazimit epik 3-3 në Montjuïc.
Finalja e Champions League është vetëm një hap larg. Në prag të takimit, mbrojtësi Alessandro Bastoni, një prej shtyllave të skuadrës së Simone Inzaghit, foli me shumë besim dhe vendosmëri në konferencën për shtyp.
“Jemi vetëm dy ndeshje larg fitimit të Champions-it. Të japësh 110% nuk mjafton: do të japim 200%,” – u shpreh Bastoni. “E dimë se po luajmë një gjysmëfinale, diçka që nuk ndodh çdo vit. Nga jashtë mund të duket normale, por nuk është aspak. Jemi të etur për ta luajtur këtë ndeshje.”
Për ndeshjen e parë: “Shikuam shumë video para ndeshjes së parë, por vetëm duke luajtur e kupton më mirë. Gabimet që bëmë mund të kishin sjellë gola të tjerë. Duhet të mësojmë dhe t’i vëmë në vështirësi ata.”
Për formën e skuadrës: “Jemi krenarë për gjithçka kemi arritur deri më tani. Ndonjëherë ndjej se nuk vlerësohet sa duhet ajo që po bëjmë. Nuk kemi pasur ditë pushimi prej kohësh sepse po japim gjithçka. Kemi mbërritur në fund dhe duhet të falënderoj grupin për këtë.”
Për tifozët: “Do të duhet të vuajmë, është normale, siç ndodhi edhe në ndeshjen e parë. Pikërisht në ato momente do të kemi nevojë për shtytjen e tifozëve tanë.”
Për buxhetin dhe objektivin: “Jemi në gjysmëfinale dhe pse kemi vetëm buxhetin e 14-të më të madh në Europë. Të arrish deri këtu është dëshmi e punës së madhe nga trajneri dhe klubi. Askush nuk na shihte si favoritë në fillim.”
Për madhështinë e Interit: “Po, mendoj se Interi është një klub i madh. Nuk jemi fshehur kurrë dhe e kemi treguar në fushë. Fjalët nuk vlejnë, flet fusha dhe ajo po na jep të drejtë.”
Për kampionatin: “Trajneri nuk na ka thënë kurrë të heqim dorë nga kampionati për të fituar Champions-in. Luajmë pa pushim prej vitesh dhe një rënie është normale. Por nuk jemi 20 pikë prapa në Serinë A, jemi ende aty.”
Për Lautaro Martinez-in: “Është lideri ynë, si në aspektin fizik ashtu edhe moral. Gjithmonë ka tension para ndeshjeve të tilla, por për secilin prej nesh, kjo është realisht një ëndërr.”
Për arbitrin Marciniak: “E kemi pasur shpesh, është një arbitër që e vlerësoj sepse mund të komunikosh me të. Nuk mendoj se ka pasur probleme me arbitrat, gjithmonë flet fusha.”
Për Pavard: “Shpresoj të arrijë në 42 fitore në Champions, do të thotë që e kemi fituar. Është një lojtar i madh, ka fituar gjithçka dhe nuk ka nevojë për prezantim. Uroj të rikthehet sa më shpejt për të na ndihmuar.”
