Banorët e Kaçinarit të Rrëshenit e kanë zhvendosur ditën e sotme protestën para godinës së Ministrisë së Infrastrukturës dhe Energjetikës, ku kundërshtojnë ndërtimin e HEC-it në këtë zonë, nga koncensionari “Shpërdhaza-Energji”.
Banorët pretendojnë se projekti është duke u zbatuar mbi bazë dokumentacionesh të dyshuara si të falsifikuara, shoqëria koncesionare nuk ka leje mjedisore të vlefshme dhe nuk ka dakordësinë publike të komunitetit.
Gjithashtu, ata pretendojnë se zbatimi i projektit është duke u bërë me presione të paligjshme ndaj banorëve dhe me përdorim të mjeteve të rënda ndërtimore, duke rrezikuar sigurinë publike dhe shëndetin e njerëzve.
Gjatë tubimit të sotëm, banorët e Kaçinarit hodhën thirrje se “Uji është jetë, mos na thaj shpirtin” dhe “Jo dorë e zezë mbi Mirditën e bardhë”.
Ata kërkojnë që të ndalohet projekti, teksa u bënë thirrje edhe organeve kompetente për të hetuar.
“Ata duan të na vjedhin ujin, pasurinë më të çmuar të njeriut. Nuk kemi asnjë lloj informacioni. Banorët nuk u vunë në dijeni për lejen që është e paligjshme. Organet kompetente të hetojnë, është në shkelje të ligjit. Të ndalohet ky projekt dhe ndërtimi i HEC, kemi vënë në dijeni të gjitha institucionet”, thanë mes të tjerash organzatorët e protestës dhe banorët e Kaçinarit.
Një prej tyre kërkoi që ministrja Belinda Balluku të dalë dhe t’u japë fjalën që projekti të pezullohet.
“I bëj thirrje ministres, zonja Balluku, të dalë këtu dhe të na japë fjalën që do pezullojë punimet për katër HEC-et në Kaçinar. Në mungesë të saj, të dalin zëvendësministrat, drejtori i koncesioneve që monitoron këto hidrocentrale që po u pijnë gjakun njerëzve në Kaçinar.” tha një nga protestuesit.
Banorët kërkuan që punimet të pezullohen deri në një vendim të qartë të drejtësisë, duke theksuar se nuk do të ndalen derisa të mbrojnë të drejtën për ujin dhe mjedisin e tyre.
“Mbase kujtohet ministrja t’i dalë gjumi dhe të dalë para këtyre banorëve. Ne kemi një peticion që do t’i paraqitet ministres dhe kryeministrit”, u shpreh një tjetër protestues.
VIDEO/ Makineritë e HEC-eve kthehen në Kaçinar të Mirditës nën rojen policore
