Policia shoqëroi mesditën e sotme Fran Frrokun, banor i Kaçinarit në Mirditë për bllokim të rrugës për kalimin e automjeteve të firmës “Shpërdhaza-Energji”.
Makineritë e firmës u panë të kalonin në fshat të shoqëruara nga forca policore, përpos protestave të vijueshme të banorëve kundër HEC-eve.
Banorët që jetojnë në Kaçinar qendër kërkuan sqarim për aktivitetin e mjeteve të rënda që po kalonin përbri shtëpive të tyre.
“Kemi qenë në oborr të shtëpisë, kemi parë makinat e mëdha të kompanisë së HEC-eve duke kaluar, vinçat dhe fadromat e mëdha. Kanë ardhur dy makina private me policë. Unë ju kërkova numrin e identifikimit dhe nuk pranuan ta kthenin kartelën identifikuese”, rrëfen Mrika Frroku, bashkëshortja e banorit të shoqëruar nga policia.
Sipas Mrikës, bashkëshorti i saj Fran Frroku u shoqërua nga policia me pretendimin se ka bllokuar rrugën, mirëpo ajo e kundërshton këtë arsyetim.
“Burri im shkoi të marrë makinën e vet sepse kishte frikë mos e gërvishtin makinat e mëdha që po kalonin se ishte e parkuar makina përjashta. Ka ardhur me makinën e vet me e fut te garazhi, ndërsa ata kanë thënë që na kanë bllokuar rrugën”, shprehet Mrika.
.
Sipas Mrikës, edhe zonjat e tjera të lagjes që dolën pasi dëgjuan zhurmën e makinerive u shtynë nga punonjësit e policisë.
“Na kanë marrë ne gratë, na kanë futur te balta sipër arës, duke na përplasur. Ishte nëna 90 vjece, unë, gra të tjera që i kemi komshinj këtu”, rrëfen Mrika.
Familja e Mrikës prej vitesh proteston kundër ndërtimit të HEC-eve në Kaçinar. Ashtu sikurse qindra banorë të tjerë ata kanë organizuar protesta në qafen e Vorres dhe në sheshin e bashkisë Mirditë.
Për Emanuel Çupin, banor të zonës, rikthimi i mjeteve të rënda të firmës tregon se nuk janë zbrapsur nga objektivi i tyre për të ndërtuar HEC-et.
“Mjetet kanë dashur që të ikin në bjeshkë të Kaçinarit për të vijuar punimet për HEC-et. Do të vijojmë rezistencën”, u shpreh Çupi për Citizens.al
Kreu i bashkisë Mirditë, Albert Mëlyshi deklaroi para banorëve se do të pezullonte vendimin e këshillit bashkiak të një muaji më herët, që i lejonte kompanisë të kryente investime në Kaçinar si rezultat i ndërtimit të HEC-eve. Mirëpo, kjo nuk e zhbën vendimin për të ndërtuar HEC-et.
Më 30 mars 2025 ishte protesta e fundit e banorëve të Kaçinarit kundër HEC-eve në Qafën e Vorres. Ata kërkuan zbrapsje të makinerive të firmës, e cila ka nisur të ndërtojë fillimisht rrugën, për të vijuar më pas me ndërtimin e HEC-eve.
Sipas firmës ndërtuese, procesi është konform ligjit, ndërsa zotëron të gjithë dokumentacionin ligjor që e lejon të kryejë punimet.
/Citizens.al
