Nga Boldnews.al
Gjykata e Posaçme vendosi këtë javë nën arrest me burg për korrupsion shefin e Qarkullimit Rrugor të Tiranës, Roven Zeka, i konsideruar si një nga njerëzit më të afërt të Drejtorit të Përgjithshëm të Policisë, Ilir Proda.
Megjithëse duket si një goditje e fortë ndaj tij, Proda dhe institucioni që ai drejton nuk ka dhënë asnjë lloj qëndrimi për arrestimin e Zekës, i mbështetur dhe i promovuar fuqishëm prek Kryepolicit të Shqipërisë.
Karriera e oficerit të arrestuar, Roven Zeka, ka një lidhje integrale me ecurinë e asaj të Ilir Prodës.
Kohë më parë, të dy kanë qenë në Komisariatin e Policisë nr.2, në Tiranë, ku Proda ishte shef komisariati, ndërsa Zeka ishte shef rendi.
Në kohët e fundit, të dy ushtronin funksionet në Elbasan, ku Proda ishte Drejtor i Policisë, ndërsa Roven Zeka ishte oficer në varësi të tij.
Në Tetor 2024, Këshilli i Ministrave e emëroi Ilir Prodën në postin e Drejtorit të Përgjithshëm të Policisë. Një muaj më pas, pas një “konkursi transparent”, Roven Zeka emërohet në postin e shefit të Policisë Rrugore të Tiranës.
Duket se ky posti ishte i vetmi vend i përshtatshëm për Zekën në Tiranë dhe pranë Drejtorit të Përgjithshëm të Policisë. Pozicionet e shefave të komisariatit, por edhe më lart në hierarkinë policore, kërkojnë domosdoshmërisht që oficerët të jenë të pajisur me çertifikatë sigurie.
Ky dokument i rëndësishëm për karrierën e zyrtarëve policorë mungon në biografinë profesionale të Roven Zekës.
Autoriteti Kombëtar i Sigurisë së Informacionit të Klasifikuar (AKSIK, ish-DSIK), ka konfirmuar zyrtarisht për “Boldnews.al” se oficeri Roven Zeka “nuk është i pajisur me Çertifikatë Sigurie Personeli”.
Sipas të njëjtit komunikim, Agjencia e Informacionit të Klasifikuar nuk sqaron detaje se përsë ky oficer nuk ka çertifikatën e sigurisë dhe as nëse i është refuzuar diçka e tillë, si edhe arsyet e mundshme.
Megjithatë, institucioni përgjegjës për pastërtinë e figurës së zyrtarëve, thekson se “në rastet kur një oficeri të policisë nuk i lëshohet, i refuzohet, i pezullohet apo i revokohet çertifikata e sigurisë, njoftohet Drejtoria e Përgjithshme e Policisë së Shtetit, duke i kërkuar që ky punonjës të mos ketë qasje tek informacioni i klasifikuar ‘sekret shtetëror’”.
Praktikisht, Roven Zeka nuk mund të emërohej në post karriere në Policinë e Shtetit. Megjithatë, “konkursi” i zhvilluar nga miku i tij, Ilir Proda, duket se i siguroi një “vend pëllumbash”, shefin e qarkullimit rrugor të Tiranës.
Në këtë pozicion, Roven Zeka qëndroi vetëm pak muaj, para se të zëvendësonte zyrën e tij me ambjentet e qelisë së paraburgimit, i arrestuar për korrupsion.
Në 18 Prill 2025, prokurorja e posaçme, Elida Kackini, firmosi urdhërin e ndalimit për Zekën, si edhe dy vartës të tij në Policinë Rrugore, Edison Tabaku e Sokol Novaku, nën dyshimet e përfshirjes në korrupsion.
Urdhëri u zbatua një ditë më pas nga Agjencia për Mbikqyrjen Policore, në varësi të Ministrisë së Brendshme dhe u konfirmua dy ditë më pas nga Gjykata e Posaçme, e cila caktoi “arrest me burg” për të tre.
Sipas vendimit gjyqësor, Zeka, Tabaku dhe Novaku dyshohet se i kanë marrë shumën prej 2 mijë euro një biznesmeni, me qëllim që të shpëtonin nga arrestimi bashkëshorten e tij, e përfshirë në një aksident automobilistik në Tiranë.
Sipas të dhënave të dosjes hetimore, të siguruar nga “Boldnews.al”, bisedat dhe më pas shumën e parave nga biznesmeni A. V. e ka marrë punonjësi i Policisë, Edison Tabaku, i cili është koordinuar për këtë veprim korruptim me eprorin e tij direkt, Sokol Novaku, dhe më tej me shefin e qarkullimit rrugor të Tiranës, Roven Zeka.
