Kafeneja pranë njësisë administrative Hotolisht në qytetin e Librazhdit, nisi të mbushej pak-nga-pak paraditen e së dielës. Banorët e fshatit u mblodhën për të disatën herë për të diskutuar rreth projektit të zgjerimit të rrugës Elbasan-Qafë Thanë.
Mes tyre, të njoftuar nga rrjetet sociale, u vu re prania e kandidatëve për deputetë nga partitë opozitare. Si duket takimi u konsiderua prej tyre një rast për të qenë aktivë politikisht, për aq kohë sa fundjava shënoi dhe nisjen zyrtare të fushatës zgjedhore.
Megjithatë, shqetësimi i përbashkët i banorëve është larg politikës: mungesa e transparencës për fatin e fshatit të tyre, i cili përshkohet në mes nga projekti i rrugës, duke prekur 25 shtëpi dhe disa ngastra bujqësore.
Dy muaj më parë, banorët iu dorëzuan institucioneve qendrore një peticion me 511 firma, por e vetmja përgjigje që kanë marrë është se “projekti është në rishqyrtim”. Ata theksojnë se nuk janë kundër ndërtimit të rrugës, por kërkojnë një zgjidhje që mos të shkatërrojë komunitetin.
Asllan Çota, një nga banorët të cilëve u rrezikohet shtëpia, i pranishëm në takim, tha me shqetësim për Citizens.al se ndihej i pasigurt për të ardhmen.
“Kam 50 vite që punoj, që nga mosha 14 vjeç. Tani jam në pension, kaq mundësi kemi ne, po të na preken këto [shtëpia dhe toka] atëherë kot fare! Më mirë të na marrin me gjithë ato… edhe merr fund kjo punë!”
Të njëjtin shqetësim ndau dhe Alfred Alliu, banor i fshatit. Ai tha se fshati është zhvilluar prej disa dekadash në trojet aktuale dhe nuk ka zanafillë vitet ’90. Ndërsa tanimë projekti i rrugës rrezikon t’i ndajë përgjysmë, duke shkatërruar gjithçka është ndërtuar.
Banorët kërkojnë zgjidhje alternative. Për këtë ata kanë propozuar dy zgjidhje: ndërtimin e një tuneli ose devijimin e rrugës përgjatë lumit Shkumbin.
“Zgjidhje për ne është tuneli ose anës Shkumbinit, që nuk prekemi dhe nuk dëmton komunitetin tonë,” argumenton Alliu.
“Me tunel nuk na prek. Po të jetë me [trase] të hapur siç bëhet fjalë, kap të gjitha shtëpitë,” shtoi Çota.
Për gazetari Osman Stafa, i përfshirë si aktivist me shqetësimin e banorëve, mospërfillja e institucioneve vjen prej situatës zgjedhore në të cilën ndodhet vendi.
“Qytetarët kërkojnë ku do kalojë kjo rrugë, si do kalojë kjo rrugë, çfarë prek kjo rrugë dhe të ndryshohen format se si mund të kompensohet prishja e shtëpive apo edhe tokave bujqësore,” theksoi Stafa, i cili ishte i mendimit se banorëve nuk u jepet përgjigje për të shmangur reagimin.
Në fund të takimit, banorët ranë dakord të protestojnë më 20 prill, me qëllim nxitjen e një reagimi institucional. Kjo nuk është hera e parë që komuniteti ngre zërin. Prej vitit 2024 ata kanë zhvilluar takime me autoritetet vendore, por nuk kanë marrë asnjëherë përgjigje zyrtare nga bashkia Librazhd apo nga ministria e Infrastrukturës.
Rruga Elbasan-Qafë Thanë është pjesë e Korridorit të VIII-të, një aks strategjik që lidh Durrësin me Varnën në Bullgari.
Punimet për këtë rrugë nisën në janar 2023 me afat vitin 2026. Deri tani janë tenderuar 11 kompani për tetë lote me një vlerë totale prej 183 milionë euro (pa TVSH)./Citizens.al
