Kreu i SPAK, Altin Dumani, i shoqëruar nga prokurorët Adnand Xholi dhe Klodian Braho, shefa sektorësh, po raporton ditën e sotme në Këshillin e Lartë të Prokurorisë (KLP) raportin vjetor të vitit që lamë pas për institucionin që ai drejton, i cili është depozituar edhe në Kuvend. Seanca dëgjimore në KLP po ndiqet edhe përfaqësues të ambasadës amerikane si edhe një prokuror i OPDAT.
Gjatë raportimit, Dumani bëri me dije se gjatë vitit të kaluar ka patur 33 zyrtarë të lartë në hetim, dy prej tyre në dy procedime të ndryshme, teksa për 19 prej tyre dosjet janë dërguar për gjykim dhe për 10 ish-zyrtarë ka patur dhe vendim të formës së prerë.
“Sa i takon luftës kundër korrupsionit, janë hetuar një numër i konsiderueshëm zyrtarësh të lartë. Gjatë 2024, janë nën hetim 33 ish zyrtarë të lartë, dy prej tyre në dy procedime të ndryshme, Nga këto, 19 janë dërguar për gjykim në gjykatë duke përfaqësuar 52.9% të rasteve. Në vitin 2024, janë 10 funkionarë të lartë publikë për të cilët ka pasur vendime të formës së prerë. Nga ana tjetër, numri i personave të dërguar në gjykatë përbën rreth 35.2% të totalit të individëve në hetim. Hetimet e vitit 2024, tregon se korrupsionit i zyrtarëve të lartë zhvillohet me skema të sofistikuara dhe faktorë si ndikimi institucional, përfshirja e rrjeteve kriminale dhe pastrimi i parave. Ritje ka shënuar edhe numri i procedimeve për veprën penale për pastrim parash, rritje me 34%, krahasuar me vitin paraardhës, rritje në masën 34% ndërkohë që krahasuar me 2021 këto procedime janë trefishuar. Gjatë 2024, konstatohen 132 hetime të filluara me kallëzime nga individë dhe institucuione. Hetimet e filluara nga kallëzimet e qytetarëve janë dëshmi e rritjes së publikut te insticioni i Prokurorisë së Posaçme.”, tha Dumani.
Në nisje të fjalës së tij, Dumani falënderoi KLP-në si të vetmin institucion që i ka mbështetur në sulmet që i janë drejtuar SPAK.
“I vetmi institucion që ka reaguar në mbrojtje të SPAK me ngjarjet që jemi ballafaquar në 2024, por edhe gjatë 2025. Pavarësisht sfidave s’e kemi ndaluar punën duke shënuar arritje në luftën kundër krimit të organizuar dhe korrupsionit.”, tha Dumani.
