Agron Shehaj, kreu i Partisë Mundësia ka treguar sesi kërkon të afrojë qytetarët shqiptarë për ta votuar në zgjedhjet parlamentare duke thënë se mesazhi i tij është “Shqipëria është e atyre që punojnë çdo ditë”.
Më tej ai foli për ndarjen nga Partia Demokratike, ku tha nëse do besonte që PD duhet të synonte rotacionin politik, nuk kishte pse të ikte nga ajo forcë politike.
“Nuk e kuptoj paragjykimin që kanë shqiptarët që biznesmenët nuk pëlqehen. Nuk e kam parë ndonjëherë. Unë nuk vete të bëj taksistin, bukëpjekësin se s’kam ça bëj. Shkoj për të dhënë mesazhin që ‘Shqipëria është e tyre që punojnë çdo ditë’. Kemi Shqipërinë e dallaveres dhe atë të punës. Shqiptarët janë një nga popujt më pro kapitalizmit, pro perëndimit. Ka shumë njerëz.. kur po vija sot më tha njëri ‘më pëlqen që flet për biznesin e ndershëm’.
Pse nuk dija unë? Nuk më janë ofruar të ndërtoja? Kam zgjedhur dhe të punoj në një sektor që s’ka lidhje me shtetin, as me doganën nuk kam punë.
Ta dëgjosh nga një sipërmarrës që paraja nuk është çdo gjë, tingëllon keq. Nuk ka kënaqësi më të madhe dhe motivim më të madh se të punosh për vendin tënd.
Unë në jetë gjërat i kam bërë hap pas hapi. Këtë herë krijuam partinë politike, në zgjedhjet e tjera të krijojmë një grup deputetësh.
Votuesit mund të zgjedhin mes një alternativë të vjetër, akoma më të vjetër dhe një partie të re. Nëse do besoja që PD do bënte atë që do duhet të bënte dhe jo të synonte rotacionin politik, nuk kisha pse të ikja.
Në çdo vend të botës, nëse ke pasur mundësi të qeverisësh dhe nuk ke pasur rezultatet e pritshme, pse duhet të votojë për herë të tretë apo të katërt? Hyra në PD me idenë të ndryshonte PD, por nuk ndryshoi”, tha ai në Top Channel.
