Një 28-vjeçar shqiptar është arrestuar nga autoritetet policore italiane në Bolzano, pasi akuzohet për trafik droge.
Mediat italiane raportojnë se operacioni u bë nga agjentët e Seksionit të Narkotikëve të Bolzanos gjatë fundjavës, pasi morën raportime për një vajtje-ardhje të dyshimtë në një godinë në lagjen “Don Bosko”.
Gjatë kontrollit u kap 28-vjeçar shqiptar, me dënime të shumta penale, teksa po i shiste kokainë një narkomani në parkingun e një supermarketi në ‘Via Buozzi’.
I riu tentoi të arratisej, por pa sukses, pasi u arrestua. Çelësat që ai tentoi të hidhte ishin të banesës së përdorur si bazë për aktivitetet e tij të trafikut të drogës. Pas kontrollit u gjetën afërsisht gjysmë kilogrami kokainë, 460 euro dhe material ambalazhimi i drogës. Raportohet se një pjesë e mirë e saj ishte në gjendje të ngurtë, tjetra e ndarë në doza nëpër qese dhe e fshehur në paketa cigaresh.
Shqiptari u arrestua për posedim dhe tregtim të lëndëve narkotike. Komisioneri i policisë Paolo Sartori kërkoi heqjen e mbrojtjes ndërkombëtare dhe dëbimin e tij nga vendi në përfundim të paraburgimit.
