Janë zbardhur detaje të reja nga dëshmia e dhënë në Gjykatë e 23-vjeçarit filipinas Mark Antony Samson, i cili akuzohet për vrasjen e studentes 22-vjeçare shqiptare në Romë, Ilaria Sula, teksa pas vrasjes, e futi trupin në një valixhe dhe e hodhi në një zonë të pyllëzuar për të fshehur krimin.
Filipinasi ka rrëfyer se Iliarian e ka vrarë mëngjesin e 26 marsit, pasi ajo shkoi një natë më parë në banesën e tij.
I dyshuari ka treguar se e reja kishte shkuar në banesën në Via Homs, në lagjen afrikane të Romës, ku Mark jetonte me nënën dhe babanë e tij në një apartament 50 metra katrorë, mbrëmjen e datës 25 mars për t’i kthyer disa nga rrobat e tij. Sipas tij ajo kishte qëndruar deri vonë në mbrëmje dhe për këtë arsye preferoi të flinte me ish-in për të shmangur transportin publik.
Mediat italiane raportojnë se Mark ka rrëfyer se vrasja ka ndodhur për shkak të xhelozisë, pasi në mëngjes kur i ka çuar mëngjesin në shtrat, i ka parë një mesazh në telefon dhe Iliaria i ka rrëfyer se po njihet me dikë tjetër.
“I dërgova mëngjesin në shtrat kur ai mesazh erdhi në telefonin e saj. Dhe ajo më tha se po njihej dikë tjetër, e humba mendjen. Në tabaka ishte edhe thika për të prerë bukën, e mora dhe e vrava. Ajo vdiq menjëherë, nuk u mbrojt.”
Filipinasi pretendon se krimin e ka kryer vetë dhe po ashtu edhe tentativën për ta fshehur atë, por ky version nuk i ka bindur hetuesit, ndërsa autori i vrasjes makabër nuk ka pranuar që t’u përgjigjet pyetjeve për praninë e prindërve të tij në shtëpi dhe rolin e tyre të mundshëm.
“Pasi e vrava, dola dhe shkova të blej detergjentë dhe disa lecka. Më pas e mbështjella trupin me celofan dhe e vendosa në dy qese të mëdha mbeturinash, njërën nga ana e kokës, tjetrën nga ana e këmbëve. E mbështolla, mora valixhen dhe e futa brenda. Kështu që vendosa valixhen jashtë derës së dhomës sime dhe fillova të pastroj njollat e gjakut. Në fund mbështolla gjithçka që kisha përdorur në një qilim, madje edhe thikën, dhe i hodha. Unë i bëra të gjitha vetë.”
Pasi pastroi gjithçka, Mark pretendon se e kishte vendosur valixhen në makinë dhe u nis drejt rrugës për në Capranica, ku hodhi valixhen me trupin nga një shkëmb.
Marrja në pyetje u bë një ditë pas autopsisë, e cila zbuloi se Ilaria u vra nga tre goditje me thikë në qafë. Megjithatë versioni i tij nuk ka qenë shumë bindës. Për këtë arsye zëvendësprokurori Giuseppe Cascini dhe prokurorja Maria Perna kanë urdhëruar kontrolle të reja.
Nyja e parë që duhet zgjidhur ka të bëjë me kohën e vdekjes. Autopsia zbuloi se Ilaria e kishte stomakun bosh, detaj që tregon se vrasja ka ndodhur gjatë mbrëmjes, edhe pikëpyetja tjetër është se Ilaria pasi kishte vendosur t’i jepte fund lidhjes, nuk ka gjasa që të ketë zgjedhur të qëndronte dhe të flinte me ish-in e saj.
Jo vetëm kaq, fakti që në makinë nuk u gjetën gjurmë gjaku, lë të kuptohet se gjaku ishte tharë.
Vrasje me paramendim?
Duhet vlerësuar gjithashtu se krimi mund të ketë ndodhur me paramendim. Marku mohoi të kishte planifikuar vrasjen, por qartësia me të cilën ai menaxhoi fazat pas krimit, nga pastrimi deri te vendimi për të hequr qafe trupin, tregon se vrasja e Ilarisë mund të jetë planifikuar.
Aq më tepër që në ditët në vijim, ndërkohë që të gjithë e kërkonin, ai vazhdoi të përdorte celularin e ish-it për t’i dërguar mesazhe qetësuese të atit dhe madje për të përditësuar statusin në profilin e vajzës në Instagram, për të devijuar dyshimet për vdekjen e saj.
Për të hequr qafe telefonin (i cili ende nuk është gjetur) duke e hedhur në një pusetë. Ndërkohë po hetohet roli i prindërve për pastrimin dhe fshehjen e trupit.
