Detaje të reja nga hetimet lidhur me ngjarjen e 25 dhjetorit 2024 në ambientet e kompanisë “One Telecommunication” në Laprakë.
Më 25 dhjetor 2024 dy persona të maskuar u futën në katin e tretë të godinës së telefonike, duke thyer drynin e derës së pasme. Nga hetimet e deritanishme rezulton se dy personat nuk ka vjedhur, por ata janë futur në sallën e mbledhjeve dhe kanë prishur disa prej pajisjeve që ndodheshin aty, duke i shkatërruar ato. Edhe pse ngjarja u konstatua, punonjësit dhe rojet e Sigurisë së kompanisë “Nazeri 2000” vendosën ta fshinin ngjarjen dhe nuk bënë kallëzim në polici.
Vetëm 3 muaj pas ngjarjes kur në media u publikua një foto e dy personave të maskuar që hyjnë në godinë atëherë edhe Policia nisi hetimin ku procedoi penalisht 8 persona.
Sipas burimeve të ‘Balkanweb”, policia dhe prokuroria po marrin çdo ditë në pyetje punonjës të kompanisë dhe të kompanisë që merret me sigurinë e kompanisë.
Rojet e sigurisë të kompanise “Nazeri” janë marrë në pyetje nga grupi hetimor, ku kanë deklaruar se nuk e kanë raportuar ngjarjen sepse nuk donin që të prishnin imazhin e kompanisë .
Hetuesit po marrin çdo ditë në pyetje edhe punonjësit e kompanisë . Po ashtu prokuroria dhe policia kanë nisur edhe këqyrjen e tabulateve telefonike të punonjësve të kompanisë dhe kontaktet e tyre me drejtuesit e kompanisë më datë 25 dhjetor 2024 dhe më pas për të zbuluar arsyen pse e fshehën ngjarjen.
Deri në këto momente të hetimeve të kryera prokuroria nuk ka ende një pistë konkrete pse u shkatërruan disa pajisje të kompanisë telefonike. Grupi hetimor ka arritur të zbulojë se një pjesë e kamerave të sigurisë më datë 25 dhjetor 2024 ditën e ngjarjes nuk funksiononin në kompani.
- Hetimi ndaj vëllezërve Veliaj
Vlen të kujtojmë se në kompaninë “One Telecomunication” punojnë edhe disa familjarë të njerëzve të veshur me pushtet dhe të gjitha të dhënat të çojnë në dyshimin se po përpiqen të fshehin provat ndaj institucionit të akuzës, SPAK!
Struktura e Posaçme Kundër Korrupsionit dhe Krimit të Organizuar (SPAK) po heton marrëdhëniet mes kompanisë “One Communication” dhe “Gogel”, e cila drejtohet nga Arbër Veliaj. Në qendër të hetimeve janë dyshimet për favorizime apo ushtrim të ndikimit të paligjshëm nga ana e Veliajt për të siguruar kontrata.
Sipas dokumenteve hetimore, kompania “One” paguan Arbër Veliajn për marketing dhe promovim, ndërkohë që fiton tendera (pa garë) në Bashkinë e Tiranës, e drejtuar nga vëllai i madh i familjes Veliaj, Erioni. SPAK ka zbuluar se një kompani sigurimi dhe “One Communication” kanë pasur marrëdhënie kontraktuale me “Gogel” në vlerë prej 5 milionë eurosh.
“Nga hetimi rezulton se klienti kryesor i ‘Gogel shpk’ është shoqëria ‘One Albania’, me një total shitjesh prej 551.639.924 lekë të reja”, thuhet në vendimin e gjykatës për caktimin e masës së sigurisë “arrest me burg” për Erion Veliaj.
Në vijim, në vendimin e Gjykatës së Posaçme jepen detaje të përfitimeve që ka marrë kompania “One” nga bashkia e Tiranës, nën drejtimin e Erion Veliaj.
Lexo edhe:
FOTO/ Persona të maskuar sulmuan “One Albania”, ngjarja u fsheh. A u vodhën serverat?
