Rastet me epilepsi sa vijnë e shtohen në vendin tonë. Në Shqipëri nuk ka statistika të sakta, por incidenca përllogaritet afro 50 për 100 mijë banorë, referuar incidencës së vendeve të ngjashme me ne.
Epilepsia nuk është vetëm e trashëgueshme. Në shtimin e saj, përveç disa sëmundjeve, ndikojnë edhe droga dhe alkooli, që po përdoren pa kufi nga të rinjtë.
Dr. Pavllo Djamandi thotë: “Ka disa faktorë që ndikojnë: sëmundje si diabeti, infeksione të ndryshme, ishemitë, droga, alkooli”.
Krizat epileptike çojnë në vdekje të papritura, ndaj një person i diagnostikuar kërkon kujdes të veçantë. Por sa zgjasin krizat te një person me epilepsi?
“Disa sekonda deri në minuta. Por pas krizës është i pavetëdijshëm, mund të urinojë”, shprehet mjeku për Top Channel.
Trajtimet mjekësore që përdoren synojnë reduktimin e krizave epileptike. Janë të rralla rastet kur mund edhe të shërohet.
