Gjykata e Lartë e Brazilit autorizoi sot padinë e ish-presidentit Jair Bolsonaro mbi një komplot të dyshuar për të përmbysur rezultatet e zgjedhjeve të vitit 2022.
Të pesë gjyqtarët e Dhomës së Parë të gjykatës vendosën në favor të akuzave të ngritura nga prokurori i përgjithshëm, Paulo Gonet kundër Bolsonaros dhe shtatë bashkëkonspiratorëve të dyshuar.
Bolsonaro, i cili i mohon akuzat, përballet me 12 vjet burg nëse shpallet fajtor.
Prokurorët pretendojnë se lideri i krahut të djathtë komplotoi me aleatët për të bërë një grusht shteti dhe për të mbetur në pushtet pas humbjes së tij nga presidenti aktual, i majti Luiz Inacio Lula da Silva.
Më 8 janar 2023, mbështetësit e Bolsonaros që refuzuan të pranonin fitoren e Lulës sulmuan Kongresin, Gjykatën e Lartë dhe pallatin presidencial në Brazilia, duke shkaktuar dëme të mëdha.
”Organizata kriminale ndërmori të gjitha hapat e nevojshëm për të përmbysur qeverinë e zgjedhur në mënyrë legjitime”, tha gjyqtari Alexandre de Moraes.
Hetuesit thonë se përpjekja për grusht shteti dështoi vetëm sepse udhëheqja ushtarake refuzoi ta mbështeste atë.
Përveç Bolsonaros, shtatë të tjerë të akuzuar përfshijnë ish-shefin e spiunazhit Alexandre Ramagem, ish-ministrin e Drejtësisë Anderson Torres dhe ish-ministrin e Mbrojtjes Braga Netto.
Ata akuzohen për komplot për të përmbysur me dhunë rendin demokratik, përpjekje për grusht shteti dhe formim të një organizate kriminale.
Gjykata e Lartë më vonë do të nxjerrë një vendim përfundimtar, pa mundësi apelimi.
Bolsonaro, të cilit tashmë i është ndaluar të mbajë poste publike deri në vitin 2030, përballet me disa hetime të tjera.Autoritetet e akuzojnë atë për shitje të paligjshme të orëve luksoze dhe bizhuterive të marra si dhurata zyrtare nga Arabia Saudite.
Ai gjithashtu dyshohet se urdhëroi të dhëna të falsifikuara të vaksinimit Covid-19 për veten, familjen dhe stafin e tij – pretendime që ai i ka mohuar vazhdimisht.
