Një zjarr masiv ka përfshirë një nënstacion elektrik në Londër, duke lënë pa energji një prej aeroporteve më të mëdha në Britani atë të Heathrow.
Për këtë arsye, për motive sigurie autoritetet në Heathrow kanë vendosur që të ndalojnë fluturimet deri në mesnatën e ditës së premte.
“Heathrow po përjeton një ndërprerje të konsiderueshme të energjisë në të gjithë aeroportin për shkak të një zjarri të madh në një nënstacion elektrik aty pranë. Ndërsa ekuipazhet e zjarrfikësve po i përgjigjen incidentit, ne nuk kemi qartësi se kur mund të rikthehet energjia në mënyrë të besueshme. Për të ruajtur sigurinë e pasagjerëve dhe kolegëve tanë, ne nuk kemi zgjidhje tjetër veçse të mbyllim Heathrow deri në orën 23:59 më 21 mars 2025”, shkruhet në njoftim.
Zjarri në Hayes ka lënë gjithashtu mijëra shtëpi pa energji elektrike dhe ka bërë që rreth 150 njerëz të evakuohen nga zonat përreth. Shkaqet e tij janë ende të paqarta.
Qindra zjarrfikës janë angazhuar për të vënë flakët në kontroll, teksa Rrjeti Kombëtar po punon për të rivendosur furnizimin me energji elektrike.
Heathrow është aeroporti më i madh në Mbretërinë e Bashkuar, me rreth 1300 ulje dhe ngritje çdo ditë. Një rekord prej 83.9 milionë pasagjerësh kaluan nëpër terminalet e tij vitin e kaluar.
Sipas faqes së internetit të gjurmimit të fluturimeve FlightRadar24, të paktën 120 fluturime për në Heathrow janë devijuar drejt aeroporteve të tjera, ndërsa 1,351 fluturime duhej të uleshin dhe ngriheshin në këtë aeroport gjatë së premtes.
Një fluturim i Qantas nga Perth u devijua në Paris Charles de Gaulle ndërsa një fluturim i United Airlines nga Nju Jorku do të ulej në Shannon, Irlandë.
