Edi Rama ka dërguar një mesazh me doza të forta kritike ne grupin Whats Up të skuadrës së deputetëve të Tiranës.
Mesazhi i Ramës i disponuar nga burimet e TCH, kërkon qëndrim pa ekuivokë të deputetëve të PS, lidhur më pavarësinë e drejtësisë, kryesisht SPAK-un.
Shkak për këtë mesazh shkruan Edi Rama, është bërë një intervistë e deputetit Etjen Xhafaj në një studio televizive, ku ka sulmuar SPAK-un për të mbrojtur Erion Veliajn.
“Jam pa fjalë! E paimagjinueshme se si një deputet i Partisë Socialiste mund të flasë si në kafene, si tifoz, duke bërë një avokati banale që për më tepër s’ndihmon askënd hiç fare, ndërkohë që s’ka asnjë lidhje me qëndrimin tonë parimor për paraburgimin pa gjyq të kryebashkiakut të kryeqytetit! A është i pafajshëm a i fajshëm Erioni apo kushdo tjetër, këtë s’ia ka ngarkuar askush as PS, as mua e as Etienit natyrisht, që ta thotë në mexhelis”.
Ata deputetë socialistë thotë Edi Rama që duan te merret me avokati publike, le ta lenë mandatin dhe le te thonë ç’të duan pastaj ne çdo cep te kënetës mediatike.
“Nuk dua të dëgjoj më asnjë prononcim që cenon pavarësinë e SPAK-ut, lidhur me rastin a me rastet konkrete, me përmbajtjen e akuzave a me pretendimet e të akuzuarve! STOP! Mbështetja jonë për SPAK-un, mbetet e palëkundur dhe kritikat tona parimore të mundshme, nuk janë as me kohë e pa kohë, as pune e kujt t’i teket nga deputetët ose përfaqësuesit e tjerë të PS! Kështu që fokusohuni tek detyrat tuaja, ku nuk hyn gjëkundi muhabeti i kafenesë për drejtësinë”.
Rama i kërkon Elisa Spiropalit ta përcjellë këtë mesazh edhe tek grupi i deputetë të qarqeve të tjera të vendit.
Çfarë tha Etien Xhafaj një ditë më parë?
Deputeti socialist Etjen Xhafaj gjatë një interviste për A2 CNN insistoi se Erion Veliaj është i pafajshëm përballë akuzave të ngritura ndaj tij. Xhafaj komentoi dhe detajet e dosjes për kreun e bashkisë së Tiranës, , duke hedhur dhe dyshime për motivet e vërteta se përse u publikua dosja e Erion Veliajt në media.
“Unë nuk merrem me shumat e grave të politikanëve për veshje. Zonja ka pasur një agjenci për promovime, videoklipe dhe nuk merrem me shpenzimet e këtij lloji. Nuk merrem me biletat e 2004, kur Erioni nuk ishte zyrtar. Unë nuk po them që drejtësia e re mos e gjykojë, por ta bëjë në gjendje të lirë, duke i marrë pasaportën, njësoj si kreu i opozitës. Ish-presidenti për mua duhet të gjykohet në gjendje të lirë. Nuk kemi asnjë faqe nga dosja e këtyre dy personave dhe të gjithë dosjen për Erion Veliajn. Dimë vetëm çështjet, por jo detajet. Për Veliajn dimë dosjen me 366 faqe”, tha Xhafaj.
