Janë zbardhur detaje të reja nga vrasja e regjistruar në Tiranë, ku një grua rreth të 30-ave u gjet e vrarë brenda një banese të marrë me qira, në rrugën “Gjon Muzaka”, pranë Bllokut të Ambasadave.
Burime bëjnë me dije se viktima është një shtetase gjermane, e cila kishte mbërritur në Shqipëri pak kohë më parë, së bashku me partnerin e saj. Ata kishin marrë me qira ditore apartamentin që prej datës 19 Shkurt.
Pronarët e banesës, pasi nuk e kishin parë prej dy ditësh çiftin, telefonuan Policinë dhe pasi uniformat blu u futën brenda gjetën vajzën pa shenja jete, me plagë thike në bark dhe në krah.
Ndërkohë, partneri i saj nuk është gjetur aty dhe është shpallur në kërkim, teksa kishte marrë me vete dhe të gjitha dokumentet, edhe të partneres së tij. Dyshohet që ai të jetë larguar nga Shqipëria.
Në dëshminë e dhënë për grupin hetimor, pronarët e banesës kanë deklaruar se e kanë dëgjuar çiftin të fliste arabisht dhe gjermanit, teksa gruaja ka qenë e mbuluar. Ende nuk dihet se prej cilit shtet janë me origjinë, por dyshohet se janë nga Lindja e Mesme.
Pronarja e banesës u ka kërkuar kartën e identitetit, kur ata kanë marrë me qira apartamentin, por kanë deklaruar se nuk e kishin.
Dyshohet se autori i vrasjes së të resë është partneri i saj, teksa shkaku dyshohet një grindje mes çiftit.
