Sali Berisha, gjatë një interviste për Syri tv, ka deklaruar se pas humbjes në zgjedhjet e vitit 2017, i kishte kërkuar Lulzim Bashës që të dorëhiqej nga posti i kryetarit të PD-së.
Sipas tij, dorëheqja e tij duhej të vinte sepse Partia Demokratike në 2017 mori humbjen më poshtëruese të saj. Berisha theksoi se, PD e nisi fushatën e 2017 në mënyrë të shkëlqyer, por pas 1 jave gjithçka u shkërmoq.
Berisha pretendon se që pas dorëheqjes në vitin 2013 dhe deri në thirrjen e “Foltores”, nuk ka patur asnjë ndikim në vendimet e PD-së.
“Unë dhashë dorëheqjen dhe ju garantoj se, nga dita e dorëheqjes gjer ditën e thirrjes së foltores, Sali Berisha nuk ka marrë në mënyrë absolute pjesë në asnjë mbledhje të kryesisë së PD, ku unë isha anëtar. Në 12 vite nuk ke dëgjuar një njeri të vetëm, unë gjithë ditën prisja njerëz, se mora këtë apo atë udhëzim nga Sali Berisha. Po, unë kam një histori si çdo njeri tjetër. Ka qenë diktaturë dhe unë i kam bërë ato shkrime, qëndrime pa asnjë qëndrim politik se diktatura po të donte për 30 sekonda të mbyllte gojën. Unë i bëra, sepse duhej të bëja atë si intelektual.
Fillimisht çfarë ndodhi. Ai (Basha) nuk dilte në media. Dhe unë i thashë njëherë, dy herë dhe më pas nuk i fola më. Ndodhnin gjërat, por njerëzit duhet të dëgjonin një zë kundër. Më thotë zyra e shtypit thoshte, por njerëzit duan një zë kundër. Merrni vitin e tij të parë dhe të dytin, daljet e tij në media numëroheshin me gishtat e dorës. Unë natyrisht shprehja qëndrimet e mia, edhe në konferenca shtypi, kundër dëshirës time. Kur ai filloi të flasë, ju ndezën llambat i lashë konferencat e shtypit, merresha me Facebook dhe studio kur më ftonin. Kisha një ligj unë, që po të pyeti do japësh mendimin si vetes tënde, ndryshe nuk duhet të përzihesh.
Në vitin 2017 i kam kërkuar dorëheqjen atij. I kam thënë, Lul duhet të japësh dorëheqjen sepse kjo është humbja më poshtëruese që kemi marrë ne, pa asnjë arsye. Filloi një fushatë, për mua të shkëlqyer javën e parë. E vidhisi fushatën, e tërhoqi për hunde Edi Rama, e bëri lolo në fushatë dhe bën hero Ilir Metën dhe dilnin pollet, dhe i vetmi opozitar dilte Ilir Meta që ishte në pushtet gjer ditën e fundit. Dhe i kam thënë, kjo është humbje poshtëruese, prandaj këtë humbje do japësh dorëheqjen dhe ti je lider i thyer. Unë nuk isha njeri dosido, nuk isha njeriu që ik ti, të vijë tjetri. Jo. Pastaj mbetej të fusja veten në lojë, e unë nuk doja të futesha në lojë. I gjithë qëndrimi im ka qenë i një ngurtësimi të plotë dhe përfundimtar drejt përfshirjes në idenë e rikthimit tim. Jo. Unë i kisha marrë vendimet e mia dhe unë i qëndroj vendimeve të mia” – deklaroi Berisha.
