Policia e Durrësit ka finalizuar një operacion për goditjen e veprimtarive kriminale në fushën e narkotikëve dhe në fushën e vjedhjes dhe si rezultat janë arrestuar 6 persona.
Sipas autoriteve, të arrestuarit, në bashkëpunim ose individualisht ushtronin veprimtarinë kriminale të shitjes së lëndëve narkotike në doza dhe të vjedhjes. Dy prej tyre ishin në kërkim për këto veprimtari kriminale.
Më konkretisht, në kuadër të operacionit të koduar “Cleaning 2”,
Fabion Masha, 27 vjeç, banues në Shijak, i cili ishte shpallur në kërkim pasi Gjykata e Durrësit i kishte caktuar masën e sigurisë “Arrest në burg”, për veprat penale “Prodhimi dhe shitja e narkotikëve”, kryer në bashkëpunim dhe “Largimi i të burgosurit nga vendi i qëndrimit”;
Ahmet Isufi, 34 vjeç, banues në Shijak, i shpallur në kërkim për veprën penale “Vjedhja”, kryer në bashkëpunim;
–Lulzim Rubjeka, 46 vjeç, banues në Shijak, Alin Gjuzi, 38 vjeç, banues në Durrës, Sentiljano Selami, 21 vjeç, banues në Manzë dhe Fation Xhezairi, 40 vjeç, banues në Durrës.
“Nga veprimet hetimore dyshohet se shtetasit Fabion Masha dhe Ahmet Isufi, në bashkëpunim me shtetasit Lulzim Rubjeka, Alin Gjuzi dhe 17-vjeçarin, në datat 15 dhe 18 shkurt, kanë vjedhur çadra plazhi dhe shezlongë në një lokal në Sektor Rinia, dhe më pas i kanë shitur në dyqanin e shtetasit E. Sh., në Kavajë.
Shtetasit Fabion Masha, gjatë kontrollit fizik dhe kontrollit në banesë, i janë gjetur dhe sekuestruar 46 gramë lëndë e dyshuar narkotike cannabis sativa, disa doza të kësaj lënde dhe 1 peshore elektronike.
Shtetasit Sentiljano Selami, gjatë kontrollit fizik iu gjet një sasi lënde e dyshuar narkotike cannabis sativa, që e posedonte me qëllim shitjen në afërsi të shkollave, ndërsa shtetasit Fation Xhezairi iu gjetën doza kokaine dhe kanabisi që i posedonte me qëllim shitjen në lagjet e Durrësit.” – njofton Policia.
Gjithashtu, janë referuar materialet në Prokurori ku nisi procedimi në gjendje të lirë për shtetasin E. Sh., 36 vjeç, banues në Kavajë, pronari i një dyqani që iu kishte blerë këtyre shtetasve shezlongët që kishin vjedhur, si dhe është shpallet në kërkim një 17-vjeçar, bashkëpunëtor për vjedhjen e shezlongëve, në një lokal.
Në cilësinë e provës materiale janë sekuestruar: 60 gramë lëndë e dyshuar narkotike cannabis sativa dhe doza të kësaj lënde, doza kokaine, 1 pershore elektronike, 6 celularë dhe 94 shezglonë të vjedhur.
Materialet procedurale i kaluan Prokurorisë së Durrësit për veprime të mëtejshme.
