Autoritetet italiane të Policisë së Romës kanë ekzekutuar një operacion të madh anti-droge, duke çuar në arrestimin e 27 personave në Itali, Shqipëri dhe Spanjë.
Raportohet se 3 persona janë arrestuar në Vlorë, ndërsa nga 27 urdhër-arrestet e lëshuara në total, 20 prej tyre janë “Arrest me burg” dhe 7 të tjerë “Arrest në shtëpi”.
Ky grup kriminal kryente aktivitetin e paligjshëm, duke transportuar sasi të mëdha kanabisi nga Vlora në drejtim të Italisë dhe më pas shpërndaheshin në të gjithë Europën falë një aleance mes grupeve kriminale shqiptare dhe nigeriane. Organizata transportonte drogën duke përdorur transportin publik.
Nga bashkëpunimi i autoriteve italiane me ato shqiptare, Policia e Shtetit ka konfirmuar se në Vlorë janë arrestuar shtetasit Anxhelo Ajazaj 27 vjeç, Klarens Dalipaj alias Klarens Dhrami, 30 vjeç dhe Xhino Hamitaj 30 vjeç.
Ata janë vënë në pranga në kuadër të operacionit ndërkombëtar të koduar “Alba Tibus”, teksa akuzohen për pjesëmarrje në një grup të strukturuar kriminal që trafikonte kanabis kryesisht në Romë, Itali.
Po ashtu, Policia shqiptare bën me dije se pjesë e grupit kriminal që transportonte drogë nga Shqipëria drejt Italisë është edhe shtetasi Eurel Liçaj, 42 vjeç, i cili aktualisht po vuan dënimin në burgun e Rrogozhinës. Liçaj u kap në Vlorë në Dhjetor të vitit 2023, pasi kanosi një person dhe qëlloi me pistoletë në ajër
Policia e Shtetit bën me dije se shtetasit e mësipërm, në kuadër të një procedimi penal të iniciuar nga Prokuroria e Romës, akuzohen se në vitin 2019, të organizuar si grup i strukturuar kriminal, kanë trafikuar në Itali (kryesisht në Romë), lëndë narkotike kanabis Sativa.
Gjithashtu, janë publikuar edhe pamjet nga arrestimi i Anxhelo Ajazajt, Klarens Dalipaj (Dhramit), dhe Xhino Hamitaj në Vlorë.
.
Nga hetimet e autoriteteve italiane ka rezultuar se një qendër e pritjes së emigrantëve në periferi të Romës përdorej si bazë për ruajtjen dhe shpërndarjen e drogës. Hetimi zbuloi se objekti ishte gjithashtu një vend rekrutimi për migrantët nigerianë, mbajtës të lejeve të qëndrimit të përkohshëm, të përfshirë në aktivitete të paligjshme.
Të arrestuarit akuzohen, në shkallë të ndryshme, për trafik droge, posedim dhe furnizim me lëndë narkotike, zhvatje, armëmbajtje pa leje dhe regjistrim fiktive të pasurisë.
Raportohet se disa prej arrestimeve janë kryer edhe në provincat e Barcelonës në Spanjë.
