Banorët e Durrësit kanë dalë sot në protestë para godinës së Bashkisë, duke kundërshtuar projektin që parashikon shembjen e banesave të tyre.
Ata e cilësuan procesin si të padrejtë, selektiv dhe të mbushur me klientelizëm, ndërsa i drejtuan akuza kryeministrit Edi Rama.
Sipas qytetarëve, projekti është “dëshira më e madhe e Ramës” dhe po zbatohet përmes vendimeve të Këshillit të Ministrave (VKM), të cilat sipas tyre po përdoren për të shpronësuar banorët me çmime qesharake dhe për të favorizuar individë të lidhur me pushtetin.
“Shtëpinë time e kam me VKM, por ai nxjerr një tjetër VKM dhe ma merr prapë. Mendo çfarë dallavera bën me VKM-të e veta”, deklaroi një protestues i revoltuar.
Banorët e akuzuan Ramën se po e shndërron Durrësin në një qytet pa durrsakë, duke e copëtuar me projekte selektive. Ata paralajmëruan se shembjet nuk janë thjesht një proces urbanistik, por një “masakër” ndaj komunitetit. “Është turp, një masakër ndaj popullit. I kemi lënë Zotit që është lart”, u shpreh një tjetër qytetar.
Banorët hodhën poshtë pretendimet e zëvendëskryetarit të Bashkisë, Elio Jani, se konsultimet me ta ishin kryer dhe se kishte prova fotografike. “Ne nuk jemi takuar me askënd. Të vijë poshtë Elio Jani e të shohim me kë ka qenë”, thanë ata, duke e cilësuar procesin mashtrues dhe të manipuluar.
Deklarata e banorëve:
“Sot ne jemi mbledhur për shtëpiat tona, të rishikohet projekti, sepse po e bëjnë Durrësin pa durrsak, po e bëjnë copë-copë, selektive.
Tani po marrim vesh nga që kanë folur, që i kemi takuar, kemi fotografi dhe jemi dakord.
Të vijë poshtë Elio Jani e të shohim me kë ka qenë Elioja. Është një masakër.
Anëtarët e Këshillit, këta që s’i dalin, janë komplet mashtruesa, që po mashtron një popull. Ne nuk i ndahemi, o të rishikohet projekti, edhe të shikojnë ato selektivet.
Që shtëpia ime, e din vetë atë për çfarë prishet. Për shtëpinë e Spartak Kovaçit. Prandaj, ne jemi këtu dhe do jemi përditë këtu. Të rikthejë, të shikojë projektin, se nuk bëhet. Je duan këto.
Këto duan të shembin shtëpiat, të vjedhin pallate. Është dëshira më e madhe e Edi Ramës, të madhit të lartë. Se ai ka nxjerrë VKM-në, shtëpinë time unë e kam me VKM. Ka nxjerrë VKM-në, po ma merr prapë me VKM.
Mendo se çfarë dallavera bën me VKM-të e veta. Mendo me popullin që po bën masakër. Turpi i mbuloftë, nuk kemi çfarë të themi më. I kemi lënë Zotit që është lart’.
