Duket se arrestimi i Erion Veliajt ka kujtuar Edi Ramën se SPAK ka probleme. Gjatë përgjigjeve të ndjekësve të tij në rrjetet sociale, Rama deklaroi se nuk do të lejojë që në emër të pavarësisë së gjyqësorit të shkelen të drejtat e njerëzve, të kapërcehen fazat e hetimit dhe gjykimit dhe paraburgimi të bëhet normë, për të kyçur brenda pa gjyq.
Gjithashtu, Rama deklaroi se nuk do ta tolerojmë një sistem drejtësie të njëanshëm, thjesht dhe vetëm të pavarur, por jo profesional dhe në shkelje të standardeve demokratike
Ndërkohë, Rama vazhdon ta konsiderojë SPAK-un si një “pronë” të tij, pasi theksoi se ishte ai që e bëri dhe jo amerikanët dhe se ai është i vetmi garanci për ekzistencën e këtij institucioni.
Duke iu përgjigjur deklaratës së Berishës se do ta shkrijë SPAK-un, Rama iu përgjigj me fjalorin vulgar se do të shkrijë Noc Rrokun.
Edi Rama: SPAK nuk është imi, por i Kushtetutës dhe reformës në drejtësi. Tani dhe SHBA është tërhequr nga kjo punë dhe nëse SPAK do ta kishte sjellë Amerika do ta kishte marrë me vete. SPAK është këtu dhe ka një garanci. Nëse SPAK do e kishte sjellë Amerika, tani që Amerika është tërheq nga kjo punë, do ta kishte marrë me vete në Amerikë. SPAK është këtu dhe ka vetëm 1 garanci. E vetmja garanci për mbijetesën dhe shkuarjen përpara të SPAK në kuadër të kësaj lufte nga këneta me në krye bufin plak është Partia Socialiste dhe unë në krye të saj. Reformën në drejtësi e kam bërë unë dhe PS.
Në 2025 sfida është të kemi një sistem drejtësie të drejtë dhe të barabartë. Pjesa e parë e sfidës, pavarësisht kostove, gjërave që nuk shkojnë, edhe me SPAK, se nuk ka rënë nga qielli. Është një institucion i ri me shumë probleme, por ka krijuar vetëbesimin e pavarësisë. Askush nuk mund të thotë sot se SPAK është i kapur nga unë. Sfida është që pavarësia të jetë garanci edhe për profesionalizëm dhe standarde.
Është i pavarur, por sfida është që pavarësia të jetë garanci edhe për profesionalizimin e standardet demokratike, sepse historia na i ka mësuar të tëra. Nuk duam e nuk do të tolerojmë një sistem të njëanshëm, thjesht të pavarur por jo profesional në shkelje të standardeve demokratike që do të thotë të gjithë kritereve të lirive e të drejtave që bëjnë diferencën mes drejtësisë në diktaturë e autokraci e asaj në demokraci. Prandaj dhe ne kemi hyrë në fazë tjetër. Na duhet të kemi një pozicion kritik për të gjitha gjërat që nuk shkojnë. Nuk mund të pranojmë në emër të pavarësisë të intimidohen njerëz që merren në pyetje, të kapërcehen fazat e hetimit e gjykimit e as të pranojmë që paraburgimi të bëhet normë për të kapur e kyçur brenda pa gjyq këdo qoftë, kur kushtet e domosdoshme që duhen plotësuar për të paraburgosur dikë janë të qarta e nuk kanë të bëjnë me një pjesë që janë konsideruar të përmbushura. Por këto janë cështje të një debate demokratik.
Një buf kënete që ulërin do të shkrij SPAK, do të shkrij SPAK, do shkrijë Noc Rrokun. Ky është dallim i madh, ne duam drejtësi të pavarur, pa parë majtas e djathtas, por patjetër një drejtësi europiane ku të gjitha palët janë ta garantuara. Jua kanë bërë gojën, ju ka futur bufi llumin e kënetës në stomak, në ezofag, në plënc e zorrë, jua kanë bërë fjalën vjedhje sikur këtu nuk bëhet asnjë punë tjetër në këtë vend, vetëm vidhet e vidhet, nuk është kështu.
