“Siguria e Evropës është në një pikë kthese”, thekson në mesazhin e saj ne platformën “X”, presidentja e Komisionit Evropian Ursula von der Leyen , e cila së bashku me Presidentin e Këshillit Evropian Antonio Costa do të marrë pjesë në takimin jozyrtar të një grupi të vogël liderësh evropianë këtë pasdite në Paris, në samitin urgjente për Ukrainën.
“Sapo mbërrita në Paris për bisedimet kritike. Siguria e Evropës është në një pikë kthese. Po, bëhet fjalë për Ukrainën, por edhe për ne. Ne kemi nevojë urgjente për një mënyrë të re të të menduarit . Duhet të forcojmë mbrojtjen.Ne kemi nevojë për të dyja tani,” thekson von der Leyen.
Nga ana e tij, Antonio Costa thekson se në samitin e sotëm në Paris, nën kryesimin e presidentit francez Emmanuel Macron dhe në prani të sekretarit të përgjithshëm të NATO-s, Mark Rutte, do të zhvillohen konsultime “për situatën në Ukrainë dhe sigurinë e Evropës”.
“Ky është fillimi i një procesi që do të vazhdojë me përfshirjen e të gjithë partnerëve të përkushtuar për paqen dhe sigurinë e Evropës. BE-ja dhe vendet anëtare të saj do të luajnë një rol qendror në këtë proces”, thekson Presidenti i Këshillit Europian në një postim në “X”.
Qëllimi është që të dakordësohet për një strategji të përbashkët për t’u përballur me Donald Trump.
