Sali Berisha gjatë fjalës së mbajtur për gazetarët jashtë Prokurorisë së Posaçme (SPAK), premtoi shkrirjen e këtij institucioni të drejtësisë, nëse ai vjen në pushtet pas zgjedhjeve të 11 Majit.
Berisha deklaroi se një institucion që është jashtë çdo kontrolli, duhet të shuhet me çdo kusht. Sipas tij, nuk mund të ndodhë që prokurorët të kontrollojnë telefonat e gjykatësve.
Berisha deklaroi se mbështetja kryesore në SHBA ndaj kësaj organizate kriminale, siç e konsideroi ai SPAK-un, ka rënë përtokë.
Sali Berisha: Të njëjtin fat me bandat do kenë prokurorët që janë të lidhur me bandat. Absolutisht ky institucion nuk do të ekzistojë. Unë ndjej keqardhje se rrëmbeheni nga momente, por një institucion që është jashtë çdo kontrolli, është një institucion për t’u shuar me çdo kusht. Së pari, ky institucion nuk mund të kontrollonte kurrë gjykatësit. Që në momentin që ky kontrollon telefonat e gjykatësve speciale, ke krijuar atë drejtësi që as Enveri dhe Hitleri nuk e kanë pasur ndryshe. Si mund t’i japësh prokurorit kontrollin e gjykatësve tek i cili çon dosjet? Merr fund që këtu. Dhe ju, njerëz të medieve, duhet ta denonconi këtë në mënyrën më të fuqishme. Ekziston një akt i tillë… prandaj u thotë ju ai afërmendsh. Aty pati një shpërthim sinqeriteti Altini. Afërmendsh gjykatësi vendos atë që i themi ne. Fatmirësisht mbështetja kryesore ndaj kësaj organizate kriminale, atje ku i iniciua, atje ka rënë përtokë. Por ne e luftuam edhe në atë kohë kur ata e mbështesnin gjer në qiell. Mos harroni këtu kur Antoni Blinken vinte dhe takonte Altin Dumanin për të falënderuar se kishte arrestuar Sali Berishën. Tani Antoni Blinken nuk hyn dot më në ndërtesat qeveritare të vendit të tij sepse ishte një Edi Ramë në Uashington.
